I shtyu personi që do arrestonin

Njëri transportohet me helikopter drejt Tiranës

Një operacion i policisë në Dibër ka përfunduar me dy efektivë të plagosur, pasi personi i shpallur në kërkim, që ishte objektiv i ndërhyrjes, ka kundërshtuar me forcë arrestimin.

Ngjarja ndodhi paraditen e kësaj të mërkure, në momentin kur forcat “Shqiponja” hynë në një banesë për të ekzekutuar urdhrin e ndalimit. Sipas informacioneve paraprake, gjatë përplasjes fizike i kërkuari ka shtyrë nga një lartësi dy punonjësit e policisë, Gentian Meda dhe Bilal Gjapi, duke u shkaktuar atyre dëmtime.

Si pasojë e goditjes në kokë, Meda është transportuar me urgjencë drejt Tiranës me helikopter për trajtim më të specializuar. Ndërkohë, Gjapi dyshohet se ka pësuar frakturë në këmbë dhe ndodhet nën kujdesin e mjekëve.

Pas incidentit, personi i shpallur në kërkim ka tentuar t’i shpëtojë prangave duke u hedhur nga kati i dytë i banesës dhe është larguar nga vendngjarja. Forcat e policisë kanë ngritur pika kontrolli në zonë dhe po vijojnë kërkimet për kapjen e tij.

Autoritetet pritet të japin një njoftim zyrtar me detaje të plota mbi rrethanat e ngjarjes.