‘Rejsi Farma’ akuzohet për pagesa të dyfishta nga spitalet publike

Një përplasje ligjore është hapur mes kompanisë farmaceutike Rejsi Farma dhe institucioneve publike të shëndetësisë, pas pretendimeve për faturim të dyfishtë dhe përfitim të padrejtë nga fondet shtetërore.

Kompania dyshohet se ka kërkuar pagesa të dyfishta për furnizimin me barna të rimbursueshme në spitale. Bëhet fjalë për fatura që, sipas institucioneve, janë likuiduar një herë në bazë të konsumit mujor, të shoqëruara edhe me akt-rakordime përkatëse.

Megjithatë, pretendohet se “Rejsi Farma” ka lëshuar fatura të reja për të njëjtën periudhë, pa reflektuar pagesat e kryera më parë. Situata ka kaluar në përplasje ligjore, pasi kompania ka tentuar të ekzekutojë këto detyrime përmes përmbaruesve privatë, duke u mbështetur edhe në një vendim të Gjykata e Fierit. Në këtë proces, për një periudhë të shkurtër, është bllokuar edhe llogaria bankare e Spitali Rajonal i Fierit.

Rasti lidhet me periudhën mars–korrik 2025, për të cilën kompania ka paraqitur një faturë shtesë në vlerën e rreth 120 milionë lekëve të vjetra. Por, si Fondi i Detyrueshëm i Kujdesit Shëndetësor ashtu edhe spitali kanë kundërshtuar këtë pretendim, duke deklaruar se pagesat janë kryer rregullisht dhe duke depozituar në gjykatë dokumentacionin përkatës.

Dy institucionet publike kanë ngritur padi ndaj kompanisë, duke kërkuar pezullimin e vendimit të parë dhe shpalljen të pavlefshëm të titullit ekzekutiv për këto fatura.

Në një seancë gjyqësore të zhvilluar në fillim të shkurtit në Tiranë, gjyqtari Aurel Arapi vendosi pezullimin e ekzekutimit të vendimit të mëparshëm të Gjykatës së Fierit. Ky vendim ndalon përkohësisht përmbarimin e faturave të kontestuara, deri në shqyrtimin përfundimtar të çështjes.

Çështja mbetet në proces gjyqësor dhe pritet që verifikimi i plotë i dokumentacionit të përcaktojë nëse kemi të bëjmë me një gabim administrativ apo me një tentativë për përfitim të padrejtë nga fondet publike të destinuara për rimbursimin e barnave në spitale.