PD ‘i ul traun’ Ervin Salianjit: Nuk mund të kandidojë për kryetar!

Partia Demokratike e Shqipërisë ka vendosur t’i mbyllë përfundimisht rrugën rikthimit në garë ish-deputetit Ervin Salianji, duke mos e lejuar të kandidojë për kreun e partisë në zgjedhjet e 23 majit.

Burime zyrtare nga selia blu konfirmojnë se Salianji nuk figuron më në listat e anëtarësisë, çka e përjashton automatikisht nga e drejta për të garuar. Në një reagim për një media, Sekretariati i Përgjithshëm i PD-së theksoi prerazi se ai nuk mund të jetë kandidat, pikërisht për shkak të mungesës së statusit si anëtar.

Kjo lëvizje vjen në një moment kur vetë Ervin Salianji nuk e kishte përjashtuar publikisht mundësinë e kandidimit, duke u konsideruar edhe si një nga rivalët potencialë më të fortë përballë Sali Berisha. Megjithatë, përditësimi i listave të anëtarësisë ka ndryshuar rrënjësisht situatën, duke e lënë atë jashtë strukturave të partisë.

Sipas qëndrimeve zyrtare, përjashtimi lidhet me shkelje të vijës politike dhe qëndrime që janë konsideruar në kundërshtim me interesat e PD-së. Vetë Sali Berisha e ka cilësuar më herët Salianjin si “të vetëpërjashtuar”, duke e akuzuar për bashkëpunim me kundërshtarët politikë.

Ndërkohë, gara për drejtimin e PD-së pritet të jetë e kufizuar, pasi edhe emra të tjerë që kanë shprehur ambicie publike, si Evi Kokalari dhe Alesia Balliu, rrezikojnë të mos lejohen të kandidojnë për shkak të mungesës së anëtarësisë në parti.