Një incident i pazakontë ka vënë në lëvizje autoritetet amerikane gjatë orëve të natës pranë Lafayette Park, zonë që ndodhet përballë Shtëpisë së Bardhë.
Shërbimi Sekret i SHBA-së bëri të ditur se po heton raportime për të shtëna me armë, të cilat janë sinjalizuar pas mesnatës. Megjithatë, nga kontrollet e menjëhershme në terren nuk është konstatuar asnjë person i dyshuar dhe nuk raportohen të lënduar.
Sipas burimeve zyrtare, agjentët kanë kontrolluar parkun dhe zonën përreth, por pa arritur të identifikojnë prova konkrete që të konfirmojnë incidentin. Autoritetet theksojnë se hetimet janë ende në zhvillim dhe çdo informacion po verifikohet me kujdes.
Sipas The Guardian, situata mbetet nën monitorim të vazhdueshëm nga strukturat e sigurisë, ndërsa pritet një sqarim më i plotë mbi atë që ka ndodhur realisht.
Në momentin e raportimeve për të shtëna, presidenti Donald Trump ndodhej brenda ambienteve të Shtëpisë së Bardhë. Deri tani nuk ka pasur një reagim të menjëhershëm nga presidenca lidhur me incidentin.
Pavarësisht alarmit, aktiviteti në Shtëpinë e Bardhë ka vijuar normalisht, ndërsa masat e sigurisë në zonë janë forcuar si masë parandaluese. Ndërkohë, Lafayette Park vijon të jetë i rrethuar prej disa javësh për shkak të punimeve rinovuese në zhvillim.
