Tiranë, Arrestohen 2 shtetase kineze, për prostitucion

Policia e Shtetit ka finalizuar në Tiranë operacionin e koduar “Foleja 6”, i zhvilluar nga Komisariati i Policisë Nr. 3, në bashkëpunim me Prokurorinë.

Sipas njoftimit zyrtar, në kuadër të këtij operacioni janë arrestuar dy shtetase nga Kina, H. W., 40 vjeçe dhe K. Sh., 38 vjeçe, të cilat dyshohet se ushtronin prostitucion në një apartament të marrë me qira në rrugën “Myslym Shyri”.

Nga hetimet rezulton se aktiviteti zhvillohej në mënyrë të organizuar, ndërsa janë identifikuar edhe persona të tjerë që përfitonin nga kjo veprimtari. Për këtë arsye, ka nisur procedimi penal për tre shtetas të tjerë, të dyshuar si përfitues.

Gjatë operacionit janë sekuestruar shuma parash të dyshuara si të përfituara nga aktiviteti i paligjshëm, si dhe dy telefona celularë.

Operacioni “Foleja 6” u zhvillua bazuar në informacione të siguruara nga strukturat policore, nën drejtimin e Prokuroria e Tiranës, ndërsa materialet procedurale i janë referuar kësaj të fundit për veprime të mëtejshme.