Tre arinj futen në oborrin e shtëpisë në Kosovë, sulmojnë qytetarin

Një skenë e frikshme dhe njëkohësisht komike është regjistruar në fshatin Hoçë të Prizrenit, ku tre arinj janë futur papritur në oborrin e një banese, duke shkaktuar habi dhe panik tek banorët.

Ngjarja është filmuar nga një prej të pranishmëve dhe videoja është shpërndarë me shpejtësi në rrjetet sociale, ku ka tërhequr vëmendjen për reagimin e pazakontë të personit që filmon.

Në pamje dëgjohet ai duke iu drejtuar arinjve me tone të qeta, madje duke i ftuar me fjalët “hajde këtu”, ndërsa kafshët afrohen gradualisht drejt portës së shtëpisë.

Megjithatë, situata ndryshon brenda pak sekondash. Sapo arinjtë i afrohen më shumë hyrjes, personi që po filmon përfshihet nga frika dhe largohet me vrap, duke braktisur menjëherë vendin.

Në sfond dëgjohet edhe një tjetër zë që thërret me panik “ik, ik”, ndërsa momenti mes kuriozitetit dhe frikës krijon një situatë sa të rrezikshme, aq edhe të pazakontë për zonën.

Videoja ka ngjallur reagime të shumta në rrjet, ku përdoruesit e kanë komentuar si një ndërthurje mes guximit të tepruar dhe reagimit instinktiv për t’u larguar nga rreziku.