Shqiptarët nuk dorëzohen, sot protesta e 37-të kundër sistemit politik

Rezistenca qytetare kundër kryeministrit Edi Rama vijon të intensifikohet, duke u shndërruar në një nga lëvizjet më të gjata dhe më të qëndrueshme të viteve të fundit në vend. Këtë të martë, në orën 19:00, pritet të zhvillohet protesta e 37-të radhazi, ku mijëra qytetarë do të mblidhen sërish në zemër të Tiranës për të kërkuar largimin e menjëhershëm të kreut të qeverisë.

Organizatorët kanë bërë thirrje për një pjesëmarrje sa më të gjerë, duke ftuar jo vetëm qytetarët nga të gjitha zonat e Shqipërisë, por edhe shqiptarët e diasporës që tashmë kanë nisur të mbërrijnë në kryeqytet për t’iu bashkuar kësaj lëvizjeje. Sipas tyre, kjo protestë konsiderohet një moment kyç në përshkallëzimin e aksionit qytetar.

Skenari i tubimit parashikon që grumbullimi të nisë në sheshin “Skënderbej”, ku protestuesit do të organizohen për të vijuar më pas me një marshim drejt godinës së Kryeministrisë. Pikërisht aty pritet të përqendrohet kulmi i protestës, me fjalime dhe mesazhe të drejtpërdrejta kundër qeverisë.

Thelbi i kësaj lëvizjeje mbetet i pandryshuar: kërkesa për largimin e Edi Ramës nga drejtimi i vendit. Organizatorët theksojnë se protestat nuk do të ndalen dhe se presioni qytetar do të vazhdojë deri në arritjen e objektivit të shpallur. Mesazhi i përsëritur në çdo tubim, “Ju erdhi fundi”, synon të mobilizojë edhe më shumë qytetarë dhe të dëshmojë vendosmërinë për ndryshim politik.

Në një klimë të tensionuar politike, kjo protestë shihet si një tjetër provë e forcës së reagimit qytetar dhe e vazhdimësisë së pakënaqësisë ndaj qeverisë aktuale.