Ervis Deti ekstradohet nga Italia, pjesë e grupit të “Visit të Pojës”

Ervis Deti, emër i përfshirë në dosjen e grupit të njohur si “Visi i Pojës”, është ekstraduar nga Italia drejt Shqipërisë në kuadër të operacionit ndërkombëtar të koduar “The Wanted”.

Sipas autoriteteve shqiptare, 41-vjeçari E. D. ishte shpallur në kërkim nga drejtësia italiane, pasi Gjykata e Barit kishte caktuar ndaj tij masën e sigurisë “arrest në burg” për veprën penale të trafikimit të lëndëve narkotike, kryer në kuadër të një grupi të strukturuar kriminal.

Ekstradimi i tij lidhet me hetimet e zhvilluara nga autoritetet shqiptare dhe italiane ndaj rrjetit kriminal të goditur në kuadër të operacionit “Ura”. Deti është përmendur në dosjen e këtij operacioni si një prej personave të përfshirë në aktivitetet e grupit të drejtuar nga Elvis Doçi, i njohur si “Visi i Pojës”.

Deti, pjesë e dosjes “Ura”

Emri i Ervis Detit doli në kuadër të hetimeve të përbashkëta shqiptaro-italiane për një rrjet që dyshohet se merrej me trafikimin e lëndëve narkotike drejt Italisë dhe vendeve të tjera të Bashkimit Evropian.

Në maj të vitit 2025, Gjykata e Tiranës miratoi kërkesën për ekstradimin e Detit, i cili ishte arrestuar gjatë operacionit “Ura” në zbatim të një urdhër-arresti të lëshuar nga autoritetet gjyqësore italiane.

Hetimet e dosjes kanë përfshirë një numër të madh personash dhe episode të dyshuara të trafikimit të drogës. Deti është përmendur gjithashtu në materialet hetimore për rolin e tij në një episod që lidhej me kalimin e paligjshëm të një personi përmes Portit të Durrësit drejt Italisë.

Vendimi i GJKKO-së për Ervis Detin

Çështja ndaj Detit ka vijuar edhe në Shqipëri. Në prill 2026, Gjykata e Posaçme e dënoi atë me 2 vite burgim, dënim i cili, për shkak të gjykimit të shkurtuar, u reduktua në 1 vit e 4 muaj burgim.

Operacioni “Ura” është zhvilluar në bashkëpunim mes autoriteteve shqiptare dhe italiane dhe ka nxjerrë në pah aktivitetin e një rrjeti të dyshuar për trafik ndërkombëtar të lëndëve narkotike.