Dy zjarre në Gjirokastër, digjet një automjet dhe një kasolle

Dy vatra zjarri janë regjistruar mbrëmjen e kaluar në lagjen “Dunavat” të Gjirokastrës, me një diferencë prej vetëm pak minutash. Në njërin rast, flakët përfshinë plotësisht një automjet, ndërsa më pas u raportua edhe një zjarr në një ambient të improvizuar ku mbaheshin materiale të vjetra.

Sipas të dhënave të shërbimit zjarrfikës, njoftimi i parë është marrë në orën 23:15, për një automjet që ishte përfshirë nga flakët në lagjen “Dunavat”.

Ekipi zjarrfikës u nis menjëherë drejt vendit të ngjarjes dhe, pas mbërritjes, konstatoi se autovetura ishte përfshirë tërësisht nga zjarri. Forcat zjarrfikëse ndërhynë për shuarjen e flakëve, duke bërë të mundur neutralizimin e plotë të vatrës.

Automjeti pësoi dëmtime të plota si pasojë e zjarrit. Nga incidenti nuk u raportuan dëme të tjera materiale.

Vetëm dhjetë minuta më vonë, në orën 23:25, pranë vendit ku kishte ndodhur zjarri i parë, u evidentua një vatër e dytë.

Këtë herë flakët kishin përfshirë një ambient-kasolle ku ishin grumbulluar rroba dhe materiale të vjetra. Zjarrfikësit ndërhynë sërish dhe arritën ta shuajnë zjarrin, duke parandaluar përhapjen e tij.

Nga kjo vatër u dogjën disa rroba dhe materiale të vjetra, ndërsa nuk u konstatuan dëme të tjera materiale.

Ndërkohë, në vendngjarje kanë shkuar edhe shërbimet ligjzbatuese, të cilat kanë nisur verifikimet për të përcaktuar shkaqet dhe rrethanat e dy zjarreve.

Për momentin nuk ka një konkluzion zyrtar nëse dy episodet kanë lidhje me njëri-tjetrin, ndërsa hetimet pritet të përcaktojnë rrethanat e plota të ngjarjeve.