Protesta e studentëve merr mbështetje të re, bashkohen edhe sindikatat e arsimit

Protesta kombëtare e studentëve, e paralajmëruar për të shtunën, më 24 tetor, pritet të mbështetet edhe nga sindikatat e arsimit. Pas Sindikatës së Pavarur të Arsimit të Shqipërisë (SPASH), edhe Sindikata e Bashkuar e Arsimit Shqiptar (SBASH) ka konfirmuar pjesëmarrjen në tubim, në shenjë solidariteti me studentët dhe punonjësit e arsimit të lartë.

Përmes një njoftimi publik, SBASH bëri të ditur se do t’i bashkohet protestës kombëtare të studentëve dhe do të solidarizohet me Sindikatën e Punonjësve të Arsimit të Lartë.

“Për një arsim më të drejtë, më të dinjitetshëm!”, është slogani me të cilin sindikata ka shoqëruar qëndrimin e saj, duke e lidhur pjesëmarrjen me kërkesat për përmirësimin e sistemit arsimor.

SPASH njofton dy tubime, para Kryeministrisë dhe Ministrisë së Arsimit

Edhe Sindikata e Pavarur e Arsimit të Shqipërisë ka konfirmuar angazhimin në protestat e së shtunës, duke bërë të ditur se përfaqësuesit e saj do të marrin pjesë në dy tubime.

Protesta e parë është planifikuar në orën 11:00, përballë Kryeministrisë, ndërsa tubimi i dytë do të zhvillohet në orën 14:00, pranë Ministrisë së Arsimit.

SPASH ka shprehur mbështetjen për nxënësit, studentët dhe pedagogët, duke kërkuar që institucionet të dëgjojnë shqetësimet dhe kërkesat e komunitetit arsimor.

Përfshirja e dy sindikatave e zgjeron mbështetjen për protestën, duke sjellë në të edhe përfaqësues të punonjësve të arsimit. Megjithatë, deri tani nuk është bërë e ditur se sa anëtarë të tyre pritet të marrin pjesë në tubimet e së shtunës.