Ishte i preferuari i Vuçiç, arrestohet kreu i Policisë Kriminale serbe

Një prej emrave më të vlerësuar publikisht nga Aleksandar Vuçiç në radhët e policisë serbe ka përfunduar në pranga. Marko Kriçak, drejtuesi i Drejtorisë së Policisë Kriminale në Serbi, është arrestuar mëngjesin e kësaj të diele me urdhër të Prokurorisë së Lartë Publike në Beograd, nën dyshimin për shpërdorim detyre.

Arrestimi i tij lidhet me hetimet për vrasjen e Aleksandar Neshoviç, i njohur edhe si Baja, i cili u vra në restorantin “27”, në zonën e Senjakut në Beograd. Sipas raportimeve të mediave serbe, Kriçak dyshohet se ka ndërhyrë në procesin hetimor, duke falsifikuar prova dhe ushtruar presion ndaj dëshmitarëve dhe personave të akuzuar, me qëllim orientimin e hetimeve drejt një versioni të paracaktuar të ngjarjes.

Procedimi ndaj tij është vënë në lëvizje pas një kallëzimi penal të paraqitur nga avokati i Veselin Miliç, ndihmësdrejtor i Policisë së Serbisë.

Ironia qëndron në faktin se Kriçak, i cili deri dje ishte një prej drejtuesve policorë të vlerësuar nga Vuçiç dhe kishte marrë vëmendje publike nga presidenti serb, tashmë gjendet përballë akuzave të rënda që lidhen pikërisht me mënyrën se si është administruar një hetim penal.

Kush është Marko Kriçak, drejtuesi i policisë që vlerësohej nga Vuçiç?

Marko Kriçak mori drejtimin e Drejtorisë së Policisë Kriminale në fund të dhjetorit 2025, duke u vendosur në krye të një prej strukturave më të rëndësishme të Ministrisë së Brendshme serbe.

Përpara këtij emërimi, ai kishte drejtuar Njësinë për Sigurinë e Personave dhe Objekteve të Caktuara (JZO), një strukturë policore që është përmendur vazhdimisht në raportimet për përdorim të dyshuar të dhunës ndaj protestuesve.

Karriera e Kriçakut nisi në Agjencinë e Sigurisë dhe Informacionit (BIA), përpara se të kalonte në radhët e Ministrisë së Brendshme. Pas emërimit të Bratislav Gashiç në postin e ministrit të Policisë, ai u bë zëvendëskomandant i JZO-së, ndërsa në vitin 2023 mori drejtimin e kësaj njësie.

Sipas raportimeve të medias serbe “Danas”, Kriçak kishte kaluar nga BIA në polici pa kryer trajnimin bazë policor. Kjo mundësi parashikohet nga legjislacioni serb, i cili lejon transferimin e punonjësve të agjencisë së sigurisë në strukturat e policisë.

Rreth formimit dhe karrierës së tij ishin ngritur pikëpyetje edhe nga politikanë të opozitës dhe gazetarë, të cilët kishin pretenduar se përpara angazhimit në BIA ai kishte punuar si shitës automjetesh. Ministria e Brendshme serbe i kishte hedhur poshtë këto pretendime.

Nga akuzat për dhunë ndaj studentëve te hetimi për vrasjen në Beograd

Emri i Kriçakut është shfaqur edhe në disa prej episodeve më të debatueshme të ndërhyrjeve policore gjatë protestave studentore që kanë tronditur Serbinë.

Edhe pse JZO nuk ishte krijuar si strukturë për ruajtjen e rendit publik, Kriçak dhe efektivët e njësisë së tij janë raportuar të kenë qenë të pranishëm në terren gjatë tubimeve në Beograd.

Një prej denoncimeve më të rënda është bërë nga studentja Nikolina Sinxheliç. Ajo ka deklaruar publikisht se Kriçak e kishte kërcënuar me përdhunim dhe e kishte goditur me shuplakë, pasi ishte shoqëruar në garazhin e ndërtesës së Qeverisë së Serbisë.

Sinxheliç paraqiti kallëzim penal ndaj tij dhe disa efektivëve të tjerë të njësisë, por, sipas raportimeve të “Danas”, çështja nuk pati përparim të konsiderueshëm në hetim. Ndërkohë, vetë Kriçak ka ngritur një padi private kundër studentes.

Një tjetër episod që ka tërhequr vëmendjen lidhet me një video ku Kriçak dyshohet se ushtron dhunë fizike dhe detyron një student të ndaluar gjatë një proteste në Jagodinë të japë një deklaratë.

Brenda strukturave policore, njësia JZO është përshkruar nga disa efektivë si “policia brenda policisë”, një përcaktim që pasqyron polemikat e ngritura rreth mënyrës së funksionimit dhe rolit të saj.

Emri i Kriçakut është përmendur gjithashtu në çështjen e dy inspektorëve, Milenkoviç dhe Mitiç, të cilët aktualisht ruhen nga Njësia Speciale Antiterroriste për shkak të informacioneve mbi një kërcënim të mundshëm ndaj jetës së tyre. Sipas raportimeve, Ministria e Brendshme kishte propozuar që mbrojtja e tyre t’i besohej JZO-së, por dy inspektorët e kishin refuzuar këtë mundësi.

Vuçiç e vlerësonte publikisht, tani përfundon në pranga

Pavarësisht polemikave dhe denoncimeve të lidhura me emrin e tij, Kriçak vazhdoi të ngjiste shkallët e hierarkisë policore. Në fund të vitit 2025 ai u emërua në krye të Policisë Kriminale, duke marrë nën autoritetin e tij edhe Shërbimin për Luftën kundër Krimit të Organizuar (SBPOK), një strukturë që bashkëpunon ngushtë me Prokurorinë për Krimin e Organizuar.

Pozicioni i tij në hierarkinë shtetërore dhe marrëdhënia me drejtuesit më të lartë të vendit u shoqëruan edhe me vlerësime publike nga Aleksandar Vuçiç. Presidenti serb e kishte përmendur disa herë pozitivisht Kriçakun, ndërsa kishte dekoruar si atë, ashtu edhe njësinë që drejtonte më parë.

Tashmë, një prej policëve që gëzonte vlerësimin publik të Vuçiçit është në qendër të një hetimi penal për dyshime mbi manipulimin e provave dhe presionin ndaj personave të përfshirë në një çështje vrasjeje.

Nga dekoratat dhe vlerësimet publike te prangat dhe dyshimet për shpërdorim detyre, rasti i Marko Kriçakut hap një tjetër kapitull të debatit mbi funksionimin e policisë serbe. Megjithatë, duhet theksuar se arrestimi dhe dyshimet e ngritura ndaj tij nuk përbëjnë një vendim fajësie, ndërsa përgjegjësia penale do të përcaktohet nga organet e drejtësisë.