Administrata në bojkot, protestë në Klos kundër draftit të ri territorial

Propozimi i mazhorancës për ndarjen e re territoriale ka nxitur reagime të forta në disa qytete të vendit, me Klosin që është kthyer në një nga pikat më të nxehta të kundërshtimit.

Qytetarë dhe punonjës të administratës vendore kanë dalë në protestë kundër planit që parashikon shkrirjen e Bashkisë Klos dhe bashkimin e saj me Bashkinë Mat. Sipas tyre, kjo lëvizje rrezikon përfaqësimin lokal dhe dëmton shërbimet për komunitetin.

Si formë presioni ndaj autoriteteve qendrore, administrata e Bashkisë Klos ka ndërmarrë një hap drastik duke bojkotuar punën, duke paralizuar pjesërisht funksionimin e institucionit.

Ndërkohë, pakënaqësia nuk kufizohet vetëm në Klos. Edhe në Belsh dhe Prrenjas janë paralajmëruar protesta, pasi të dyja këto bashki përfshihen në hartën e re territoriale dhe rrezikojnë të shkrihen sipas propozimit të mazhorancës.

Banorët dhe përfaqësuesit lokalë në këto zona shprehen se reforma është e njëanshme dhe nuk reflekton interesat reale të komuniteteve, duke kërkuar rishikim të plotë të projektit.

Zhvillimet e fundit tregojnë se reforma territoriale po përballet me rezistencë në terren, ndërsa pritet që protestat të përshkallëzohen në ditët në vijim nëse nuk ka reflektim nga institucionet përgjegjëse.