Aeroporti i Vlorës, Pacolli: Do ta çojmë Shqipërinë në Abitrazh

Përditësuar më 5 August 2026, 09:24

Biznesmeni Behgjet Pacolli ka reaguar ashpër pas njoftimit të Ministrisë së Infrastrukturës për nisjen e procedurave për zgjidhjen e kontratës së koncesionit të Aeroportit të Vlorës. Ai deklaron se kompania MABCO Constructions SA nuk ka marrë asnjë njoftim zyrtar nga autoritetet shqiptare, duke e konsideruar situatën të papranueshme.

Sipas Pacollit, është e pakuptueshme që një investim i përmasave strategjike të komunikohet përmes mediave dhe jo në rrugë institucionale. Ai paralajmëron se nëse vendimi konfirmohet, Shqipëria po hyn me vetëdije në një përplasje ligjore në arbitrazh ndërkombëtar.

Pacolli thekson se kompania ka bërë përpjekje të vazhdueshme për të shmangur këtë skenar dhe për të gjetur një zgjidhje përmes dialogut institucional, por sipas tij, kjo është bërë e pamundur për shkak të heshtjes dhe veprimeve të papërgjegjshme nga përfaqësues të institucioneve shtetërore.

Ai nënvizon se çdo proces arbitrazhi do të jetë pasojë direkte e neglizhencës, vendimeve të kundërligjshme dhe mungesës së përgjegjësisë nga ana e zyrtarëve publikë, duke paralajmëruar se kostoja financiare do të rëndojë mbi qytetarët shqiptarë dhe biznesin.

Sipas tij, MABCO ka investuar mbi 320 milionë euro në këtë projekt dhe kishte përmbushur pothuajse të gjitha detyrimet kontraktore, duke qenë në fazën përfundimtare për certifikimin e aeroportit. Megjithatë, zhvillimet e mëvonshme kanë penguar vijimin e punimeve.

Pacolli akuzon se pas vendimeve gjyqësore, grupe të caktuara, me mbështetje apo tolerim institucional, kanë bllokuar hyrjen e kompanisë në kantier, ndërsa pajisje të rëndësishme janë dëmtuar apo zhdukur. Ai e cilëson këtë situatë si një paradoks, ku nga njëra anë pengohet përfundimi i projektit dhe nga ana tjetër kjo përdoret si justifikim për prishjen e kontratës.

Sipas biznesmenit, kjo situatë bie ndesh me detyrimet kontraktore, marrëveshjet ndërkombëtare për mbrojtjen e investimeve dhe parimet bazë të së drejtës, duke shtuar se askush nuk mund të përfitojë nga veprimet e veta të paligjshme.

Në përfundim, Pacolli deklaron se nëse procedura vijon, kompania do të ndjekë të gjitha rrugët ligjore për mbrojtjen e interesave të saj, përfshirë edhe arbitrazhin ndërkombëtar ndaj Republikës së Shqipërisë. Ai thekson se kjo nuk është një kërcënim, por një pasojë e drejtpërdrejtë e situatës së krijuar.

Deklarata e Behgjet Pacollit:

Aeroporti i Vlorës

Sot Ministria e Infrastrukturës dhe Energjisë ka nisur procedurën për zgjidhjen e Kontratës së Koncesionit të Aeroportit Ndërkombëtar të Vlorës. Deri në këtë moment, MABCO Constructions SA nuk ka marrë asnjë njoftim zyrtar nga Autoriteti Kontraktor. Për një investim strategjik me rëndësi kombëtare, është e papranueshme që investitori të informohet nga mediat dhe jo nga institucionet shtetërore.

Nëse ky lajm rezulton i vërtetë, atëherë shteti shqiptar po zgjedh me vetëdije rrugën e arbitrazhit ndërkombëtar.

MABCO ka bërë çdo përpjekje për ta shmangur këtë skenar dhe për të gjetur një zgjidhje institucionale. Fatkeqësisht, përballë papërgjegjshmërisë, heshtjes dhe veprimeve të paligjshme të disa përfaqësuesve shtetërorë, çdo mundësi për zgjidhje është mbyllur.

Ky arbitrazh do të jetë pasojë e drejtpërdrejtë e neglizhencës, veprimeve të kundërligjshme dhe papërgjegjshmërisë së disa përfaqësuesve të institucioneve shtetërore, e veprimeve të elementëve që, nën mbulesën e institucioneve, kanë vepruar jashtë ligjit, si dhe e dështimit të një sistemi drejtësie të ndikuar për të garantuar zbatimin e ligjit dhe mbrojtjen e të drejtave të investitorit.

Nuk kam dëshiruar kurrë që taksapaguesit shqiptarë të paguajnë faturën e neglizhencës, papërgjegjshmërisë dhe vendimeve të paligjshme të zyrtarëve që sot vazhdojnë të sillen me indiferencë, sepse ata nuk mbajnë asnjë përgjegjësi personale. Dëmin nuk e paguajnë ata, por qytetarët shqiptarë dhe biznesi.

MABCO është ekspozuar financiarisht me mbi 320 milionë euro, pa përfshirë humbjen e fitimit dhe kostot ligjore. Kompania kishte përfunduar pothuajse të gjitha detyrimet kontraktore dhe ndodhej vetëm pak para fazës së certifikimit të aeroportit.

Megjithatë, pas vendimit të Gjykatës së Lartë, grupe që veprojnë në mënyrë arbitrare dhe jashtë ligjit, me mbështetje ose tolerim institucional, penguan MABCO-n të hynte në kantier dhe të përfundonte projektin. Për muaj të tërë, në prani të Policisë së Shtetit, investitori u mbajt jashtë pronës së tij, ndërsa pajisje me vlerë u dëmtuan, u shkatërruan dhe një pjesë edhe u vodhën.

Paradoksi është i qartë: nga njëra anë institucionet penguan përfundimin e projektit, ndërsa nga ana tjetër kërkojnë ta përdorin këtë pengesë si arsye për zgjidhjen e kontratës.

Kjo bie ndesh me vendimin e Gjykatës së Lartë, me Kontratën e Koncesionit, me Marrëveshjen Dypalëshe për Mbrojtjen e Investimeve ndërmjet Zvicrës dhe Shqipërisë dhe me parimin universal të së drejtës se askush nuk mund të përfitojë nga sjellja e vet e paligjshme.

Nëse procedura konfirmohet, MABCO do të mbrojë të drejtat e saj me të gjitha mjetet juridike, përfshirë provat dhe faktet qe posedon kunder seicilit qe ka shkaktuar këtë skandal të turpshëm e deri të ARBITRAZHI tregtar  ndërkombëtar kundër Republikës së Shqipërisë.

Ky nuk është një kërcënim. Është pasoja juridike e veprimeve joligjore dhe mosveprimeve të papërgjegjshme të përfaqesuesve të institucioneve shtetërore.