Akuzat që çuan në arrestimin e tetë zyrtarë të Agjencisë Kombëtare të Burimeve Natyrore

Mbrëmjen e djeshme, Policia e Tiranës ka ekzekutuar masat e sigurisë “Arrest me burg”, dhënë nga Gjykata, për 5 prej zyrtarëve, ndërsa për një tjetër është ekzekutuar masa “Arrest shtëpie”. Burimet thanë se veprimet e Policisë në terren kanë vazhduar edhe gjatë natës, për ndalimin e dy personave të tjerë, për të cilët po ashtu janë zhvilluar hetime nga organi i Akuzës së kryeqytetit.

Burimet konfirmuan mbrëmë se ata akuzohen për katër vepra penale: Mashtrim me pasoja të rënda, neni 143 i Kodit Penal; Kontrabandë me mallra që paguhen akcizë, neni 172 i Kodit Penal; Fshehje të ardhurash, neni 180 i Kodit Penal; dhe Shpërdorim detyre, neni 248 i Kodit Penal. Lajmi u konfirmua mbrëmë përmes burimeve konfidenciale të Prokurorisë së Tiranës. Ndërkohë, nga ana e Policisë nuk pati asnjë informacion zyrtar, duke qenë se operacioni ishte ende në vazhdim.

Emrat e personave të arrestuar nuk janë bërë ende të ditur dhe pritet që sot Policia e Prokuroria të shpërndajnë një njoftim më të detajuar, qoftë sa i përket pozicionit të zyrtarëve të akuzuar, qoftë edhe për shkeljet që ata kanë kryer duke shpërdoruar detyrën. Agjencia Kombëtare e Burimeve Natyrore ka si objekt të veprimtarisë së saj zhvillimin, mbikëqyrjen e shfrytëzimit racional të burimeve natyrore, në bazë të politikave qeverisëse dhe monitorimin e postshfrytëzimit të tyre në sektorin minerar, hidrokarbur dhe energjetik.

Fusha e veprimtarisë së AKBN konsiston ndër të tjera edhe në: Propozimin, konsultimin dhe bashkëpunimin me strukturat përkatëse të qeverisë për hartimin e politikave të saj dhe strategjive në fushën e minierave, hidrokarbureve dhe energjisë; Zbatimin e politikave të qeverisë në fushën e minierave, hidrokarbureve dhe energjisë; Sigurimin brenda fushës së veprimtarisë së vet, të oponencës qeveritare për studimet dhe projektet në fushën e veprimtarisë minerare, postminerare, hidrokarbure dhe të energjisë, të paraqitura nga subjektet shtetërorë a privatë, vendase ose të huaja. Për raste të veçanta mund të kërkojë asistencë të specializuar; Promovimin e burimeve minerare, hidrokarbure, hidrike dhe burimeve të rinovueshme të energjisë.