Alarm për bomba në Malin e Zi/ Mbyllen aeroportet e Podgoricës dhe Tivatit

Mali i Zi është alarmuar këtë të shtunë nga një njoftim për bomba në aeroportet e Podgoricës dhe të Tivatit.

Autoritetet e Malit të Zi janë telefonuar nga një person i paidentifikuar me numër të huaj, i cili është shprehur se në dy aeroportet janë vendosur bomba.

Mediat vendase raportojnë se menjëherë janë mbyllur aeroportet e Podgoricës dhe Tivatit duke shkaktuar kaos.

Ekipet e inspektimit kanë nisur kontrollet për të verifikuar nëse alarmi është ose jo i rremë.

Pilotët që kanë qenë nisur në fluturim drejt këtyre dy aeroporteve janë njoftar të mos ulen deri në përfundimin e kontrolleve.

Kujtojmë se ky nuk është rasti i parë i një alarmi për bombë në Malin e Zi. Edhe më parë janë ngritur alarme, të cilat më pas kanë rezultuar false.