Almer Toska: Arbër Abazi bleu vilën qeveritare në Peshkopi!

Gazetari Almer Toska ka ngritur pikëpyetje mbi shitjen e një vile qeveritare në Peshkopi, duke pretenduar se prona është blerë nga Arbër Abazi, bashkëshorti i vajzës së ish-zv.kryeministres Belinda Balluku.

I ftuar në emisionin “Minuta e Parë”, Toska prezantoi edhe një fotografi të vilës dhe deklaroi se transaksioni është kryer në fund të vitit 2025. Ai vuri në diskutim mënyrën se si një pronë në pronësi të shtetit ka përfunduar në shitje dhe rrethanat që shoqërojnë kalimin e saj te një blerës privat.

Sipas gazetarit, një emision investigativ i është drejtuar Prokurorisë së Posaçme me një kërkesë për informacion lidhur me këtë çështje, por deri më tani nuk ka marrë përgjigje nga SPAK.

Toska përmend edhe lidhjen e pretenduar me familjen Balluku

Gjatë deklaratës së tij, gazetari ngriti dyshime për një lidhje të mundshme të çështjes me Belinda Ballukun. Ai përmendi edhe gjyshin e ish-zv.kryeministres, Beqir Balluku, për të cilin tha se kishte qëndruar në këtë vilë gjatë periudhës komuniste, kur bënte pjesë në nomenklaturën e kohës.

Toska e përdori këtë detaj për të ngritur pikëpyetje mbi historikun e pronës dhe arsyet që mund të kenë çuar në shitjen e saj.

Megjithatë, pretendimet e bëra në emision nuk shoqërohen në materialin e publikuar me dokumentacion që të vërtetojë procedurën e shitjes, vlerën e transaksionit apo rrethanat e blerjes.

Deklarata e plotë e Almer Toskës

“ Kjo është vila qeveritare në Peshkopi. Kjo vilë është blerë. Nuk e di se si pronat qeveritare dalin në shitje, por është blerë nga Arbër Abazi, dhëndri i Belinda Ballukut. Kjo blerje ka ndodhur nga fundi i vitit 2025.

Një emision investigativ i ka bërë kërkesë SPAK-ut, i cili në regjistrin e tij shënon kërkesat për informacion, por nuk jep asnjë përgjigje për këtë çështje.

Dyshimet të çojnë te Belinda Balluku. Balluku, me 300 apartamente, për çfarë i duhej vila qeveritare? Pse ka pushuar gjyshi i saj? Gjyshi i Ballukut dikur ka pushuar në këtë vilë, si pjesë e nomenklaturës së asaj kohe. SPAK-u nuk jep shpjegime për këtë çështje.”