I faturon arrestimin e Ilir Metës

Gjatë seancës në Kuvend, një nga pyetjet që iu drejtua kreut të SPAK, Altin Dumani, lidhej me arrestimin e ish-Presidentit Ilir Meta. Deputeti Tedi Blushi e pyeti Dumani pse SPAK nuk e përfshiu BKH-në dhe la dorë të lirë Policisë së Shtetit për ekzekutimin e masës.

Në përgjigjen e tij, Dumani theksoi se ekzekutimi i masave të sigurimit është përgjegjësi e Policisë së Shtetit.

“Policia e Shtetit është përgjegjëse për ekzekutimin e masave të sigurimit. E thashë edhe më parë gjatë përgjigjeve ndaj disa deputetëve”, u shpreh kreu i SPAK.

Ndërsa lidhur me kalimin e dosjes së arrestimit të Metës nga SPAK tek Prokuroria e Tiranës, Dumani sqaroi se kjo është kompetencë e Prokurorisë së Përgjithshme.

“Është e qartë dhe taksative që ne nuk mund ta hetojmë këtë veprë penale. Subjektet e veprës penale nuk janë brenda kompetencës së SPAK”, – tha ai.

Mënyra e arrestimit të ish-Presidentit ka shkaktuar debate të forta, pasi Meta u nxorr forcërisht nga automjeti me të cilin po udhëtonte. Rreth tre javë pas marrjes së detyrës nga Ilir Proda, si Drejtor i Përgjithshëm i Policisë së Shtetit, ka pasur reagime edhe nga Avokati i Popullit, i cili ka kryer një hetim mbi respektimin e kompetencave nga Policia.