Ambasada amerikane reagon për protestat: Dhuna nuk është angazhim qytetar

Ambasada e Shteteve të Bashkuara të Amerikës në Tiranë ka reaguar lidhur me protestat e zhvilluara në Shqipëri, duke u bërë thirrje qytetarëve që marrin pjesë në tubime të respektojnë ligjin dhe të shmangin çdo formë dhune.

Përfaqësia diplomatike amerikane ka theksuar se e drejta për të protestuar duhet të ushtrohet në mënyrë të ligjshme dhe paqësore.

“Nxisim qytetarët që marrin pjesë në protesta të veprojnë në mënyrë të ligjshme dhe paqësore. Aktet e dhunshme nuk janë pjesë e angazhimit qytetar”, thuhet në përgjigjen e Ambasadës së SHBA-së për News24.

Mesazhi i ambasadës përqendrohet te mënyra se si duhet të zhvillohen protestat, pa shprehur një qëndrim mbi kërkesat politike të protestuesve apo organizatorët e tyre.

Reagimi vjen në një kohë kur protestat në vend janë shoqëruar me tensione dhe përplasje, duke e vendosur në qendër të vëmendjes mënyrën e menaxhimit të tubimeve dhe respektimin e rendit publik.

Përmes këtij qëndrimi, ambasada amerikane nënvizon dallimin mes ushtrimit paqësor të së drejtës për protestë dhe akteve të dhunshme, duke u kërkuar pjesëmarrësve të veprojnë brenda kufijve të ligjit.