Anxhela Paparizo merr drejtimin e AMVV-së

Anxhela Paparizo pritet të jetë drejtuesja e re e Agjencisë për Mbështetjen e Vetëqeverisjes Vendore (AMVV), duke marrë kështu drejtimin e një prej institucioneve që luan rol në procesin e decentralizimit dhe mbështetjen e pushtetit vendor.

Paparizo ka një karrierë mbi 20-vjeçare në administratën vendore, e ndërtuar mes Shqipërisë dhe Kanadasë. Gjatë viteve të angazhimit profesional, ajo ka mbajtur edhe pozicione drejtuese në struktura të qeverisjes vendore, ndërsa në eksperiencën e saj përfshihet puna në Bashkinë e Tiranës dhe në administratën e Burlingtonit, në Ontario.

Para kalimit drejt AMVV-së, Paparizo drejtoi Qendrën Spitalore Universitare “Nënë Tereza”, detyrë të cilën e mbajti deri në mesin e këtij viti.

Profili i saj profesional është shoqëruar edhe me vlerësime publike. Paparizo është nderuar me çmimin “Elitë e Gruas Shqiptare në Botë”, në kuadër të vlerësimeve për kontributin dhe karrierën e saj.

Në krye të AMVV-së, ajo pritet të pasojë Stiljan Llavdanitin, i cili ka ushtruar detyrën si Drejtor i Përgjithshëm i komanduar i këtij institucioni.

AMVV ka në fokus mbështetjen e njësive të vetëqeverisjes vendore dhe avancimin e procesit të decentralizimit, në zbatim të politikave shtetërore dhe kuadrit ligjor për pushtetin vendor.