Arbitrazhi ndërkombëtar shpall të ligjshëm mbylljen e IuteCredit në Kosovë, Kurti: I shpëtuam buxhetit mbi 30 milionë euro

Kryeministri i Kosovës Albin Kurti ka bërë publik vendimin e arbitrazhit ndërkombëtar mbi heqjen e licencës të Iute Credit nga Banka Qëndrore e Kosovës.

Përmes një postimi në facebook, Kurti shkruan se pretendimet e ngritura nga kompania mikrofinanciare për një mbyllje arbitrare janë rrëzuar në arbitrazh dhe vendim për heqjen e licencës ka qenë i drejtë.

Ai shton se si pasojë e kësaj fitoreje Ministria e Drejtësisë i ka shpëtuar buxhetit të taksapaguesve të Kosovës një shumë mbi 30 milionë euro.

POSTIMI I PLOTË

Republika e Kosoves shënon fitoren e radhës në arbitrazhin ndërkombëtar, duke vërtetuar ligjshmërinë e veprimeve institucionale ndaj investitorëve. Republika jonë ka krijuar ambient të përshtatshëm për investime të huaja dhe marrëdhënieve me investitorë i qaset me përkushtim e seriozitet të plotë.

Kompania mikrofinanciare IuteCredit kishte paditur shtetin e Kosovës në arbitrazh me pretendimin që revokimi i licencës nga Banka Qendrore e Kosovës ishte arbitrar dhe i paligjshëm, pretendime këto që u hodhen poshtë në tërësi nga Tribunali i Arbitrazhit.

Paneli i arbitrave vërtetoi që institucionet tona nuk kanë shkelur ndonjë nga obligimet e parapara sipas Ligjit për Investime të Huaja, duke konfirmuar ligjshmërinë e tyre.

Ministria e Drejtësisë, së bashku me Avokaturën Shtetërore, janë siguruar që Kosova të përfaqësohet dhe mbrohet denjësisht gjatë gjitha fazave të procedurës në arbitrazh, duke ia përkushtuar të gjitha resurset e nevojshme ekipit mbrojtës për ta bërë të mundur këtë rezultat.

Si pasojë e kësaj fitore, Ministria e Drejtësisë, i ka shpëtuar buxhetit të taksapaguesve mbi 30 milionë Euro.

Gjatë këtij mandati qeverisës, kjo është fitorja e dytë e Kosovës në arbitrazhin e investimeve, pas rastit Selmani në padinë ndaj shtetit me vlerë të pretenduar rreth 65 milionë Euro.

Falenderoj Ministrinë e Drejtësisë, Avokaturën Shtetërore në kuadër të Ministrisë si dhe ekipin përfaqësues të Squire Patton Boggs, për fitoren e Republikës së Kosovës.