Arrestimi i Henri Çilit/ Kryente telefonata me gjyqtaret për lirimin nga burgu të bandës së Lazaratit

Mësohet se Çili është arrestuar për llogari të policisë së Gjirokastrës me akuzën për korrupsion te organet e drejtësisë. Bashkë me Çilin është arrestuar dhe avokati i tij Ilir Korbi dhe 7 persona të tjerë.

Arrestimet janë kryer me urdhër të prokurorisë së Përmetit, dhe dyshohet se ata ndikonin për të liruar anëtarët e bandës së Lazaratit.

Emri i Çilit del në përgjime për ndërhyrje te një gjyqtar, për lirimin nga burgu të dy të burgosurve të arrestuar në Lazarat.

Bëhet fjalë për dy vëllezërit Aliko, të cilët janë dënuar me burg për vrasjen e efektivit të RENEA-s Ibrahim Basha, ndodhur në Lazarat gjatë aksionit të policisë në vitin 2015, kundër kultivimit të drogës.

Aksioni ka nisur dje në mbrëmje dhe botuesi është ndaluar sot nga oficerët e policisë Tiranë. Henri Çili fillimisht është mbajtur një orë në drejtorinë e Tiranes dhe pastaj në Drejtorinë e Përgjithshme.

Newsbomb.al mëson se në minutat në vazhdim policia e shtetit do të dalë në një deklaratë për shtyp për të dhënë detaje rreth kësaj ngjarje që ka tronditur opinionin.

Pas arrestimit të Çilit është rrethuar EUT, ku kanë vijuar kontrollet gjatë mesnatës.

Henri Çili është pronar i UET, njëherazi themelues i botimeve “Mapo”, medie të cilën e ka themeluar në korrik të vitit 2010, por që e ka shitur disa muaj më parë.