Arrestohet në Dubai Kristo Qirici, zbardhet lidhja me Edmond Papën

Një tjetër zhvillim i rëndësishëm në frontin e goditjes së krimit të organizuar ka ardhur nga Dubai, ku është vënë në pranga një prej emrave të njohur për drejtësinë shqiptare. Bëhet fjalë për Kristo Qiricin, i njohur ndryshe edhe me identitetin Jetmir Hoxha, i cili rezulton i lidhur me një nga sagat më të përfolura kriminale të viteve të fundit në Shqipëri.

Arrestimi i tij është kryer në kuadër të operacioneve të koordinuara me strukturat e drejtësisë shqiptare, ndërsa bashkë me të janë ndaluar edhe disa persona të tjerë të shpallur në kërkim nga SPAK, mes tyre Shkëlzen Kraja, Ilir Lazri, Aleks Pepaj dhe Merxhan Çeliku.

Kristo Qirici është vëllai i Edmond Papës, biznesmenit që u ekzekutua në një atentat mafioz në Tiranë në fund të vitit 2022. 43-vjeçari konsiderohet si një figurë me ndikim në rrjete të dyshuara kriminale, ndërsa emri i tij është përmendur në disa episode kyçe të konflikteve të dhunshme mes grupeve rivale.

Sipas të dhënave hetimore, Qirici dhe vëllai i tij administronin hotelin “Blue Sky” në zonën e Sarandës, një strukturë që ka dalë disa herë në skenë në dosje hetimore. Pikërisht në këtë hotel raportohet se kishte qëndruar edhe Aleksandër Sadikaj, pak ditë përpara se të humbte jetën në një atentat me eksploziv në Tiranë.

Në dokumentet e hetimit, hoteli përmendet si një pikë kontakti mes personave të ndryshëm të përfshirë në ngjarje kriminale, ndërsa janë evidentuar edhe komunikime ku persona të lidhur me strukturat shtetërore kërkonin ndërmjetësim për akomodim.

Saga e përplasjes mes grupeve rivale, ku përfshihet edhe familja Papa, dyshohet se ka nisur nga konfliktet për trafikun e lëndëve narkotike dhe mosmarrëveshjet për pagesa. Kjo përplasje ka prodhuar një zinxhir ngjarjesh të rënda kriminale, përfshirë atentate me armë zjarri dhe shpërthime me eksploziv.

Ekzekutimi i Edmond Papës më 16 dhjetor 2022 në Tiranë shënoi një nga kulmet e këtij konflikti. Ai u qëllua me armë zjarri në hyrje të një lokali, pak minuta pasi ishte ulur në tavolinë. Edhe pse u transportua me urgjencë në spital, nuk arriti t’u mbijetojë plagëve.

Ngjarja u pasua nga dyshime të forta për hakmarrje mes grupeve, duke e bërë këtë konflikt një nga më të ndërlikuarit dhe më të rrezikshmit në vend në vitet e fundit.

Arrestimi i Kristo Qiricit konsiderohet një zhvillim kyç në hetimet e SPAK, ndërsa pritet që procedurat për ekstradimin e tij drejt Shqipërisë të vijojnë në ditët në vijim.