Përditësuar më 10 October 2026, 12:22

Për dosjen italiane të call centerave

Një dosje e mbërritur nga Italia për aktivitetin e call centers ka vënë në lëvízje Prokurorinë e Posaçme (SPAK), ku nën hetim janë ish-deputeti socialist Artan Gaçi dhe businessmani Idlir Lopçi. Në fokus të hetimeve janë kompanitë RAKEHA dhe SUPREME, të cilat kanë ushtruar aktivitet në fushën e marketingt telefonik. Më 8 tetor 2026, Gaçi u paraqit në SPAK i shoqëruar nga avokati Gurali Braimllari, i cili konfirmoi se clienti i tij është nën hetim dhe se ka dhënë shpjegime, duke kërkuar gjithashtu të njihet me aktet e dos.

Nga call center-at te tokat e Zvërnecit: dokumentet që lidhin Artan Gaçin me Idlir Lopçin

Një kompani me xhiro mbi 1 milion euro, një resort në Himarë i përfshirë në hetimet e SPAK-ut dhe transaksione pronash me vlerë dhjetëra milionë euro: dokumentet tregojnë lëvizjet e ortakëve dhe të kuotave përgjatë viteve. Në këtë rrjet biznesesh shfaqet edhe South Adriatic Development, e cila bleu pronë nga Artur Shehu, emër i përfshirë në hetime për pastrim parash.

Një dosje e ardhur nga Italia për aktivitetin e call center-ave e ka rikthyer Artan Gaçin në SPAK si person nën hetim dhe ka nxjerrë në pah lidhjet e tij të vjetra të biznesit me Idlir Lopçin. Ish-deputeti socialist u paraqit të enjten në Prokurorinë e Posaçme, ku dha shpjegime për hetuesit. Avokati i tij konfirmoi statusin procedural.

Dokumentet e kompanive tregojnë se marrëdhënia mes Gaçit dhe Lopçit shtrihet përtej aktivitetit të call center-ave. Emri i Lopçit shfaqet në shoqëri që kanë kaluar nga tregtia dhe shërbimet telefonike te investimet në prona në bregdet, përfshirë tokat e Akërnisë dhe Zvërnecit.

Ortakëria e hershme dhe rritja e SUPREME

Gaçi dhe Lopçi kanë qenë ortakë në kompaninë RAKEHA që prej vitit 2006. Më vonë, Gaçi i besoi Lopçit administrimin e AG.TCC, shoqërisë ku ish-deputeti zotëronte 100 për qind të kuotave.

Marrëdhënia e tyre dokumentohet deri në vitin 2022, kur Lopçi u emërua likuidues i RAKEHA-s. Kjo ndodhi pasi Gaçi ia kishte kaluar Festim Çelës ushtrimin aktiv të të drejtave mbi kuotat e tij.

Në të njëjtën periudhë, Lopçi ishte përfshirë në biznesin e call center-ave përmes kompanisë SUPREME, të cilën e bleu në vitin 2018 për 25.500 euro. Sipas bilanceve, xhiroja e kompanisë u rrit nga rreth 28 mijë euro në vitin 2017 në mbi 1 milion euro një vit më pas.

Rritja prej afro 38 herësh e vendos aktivitetin financiar të SUPREME në qendër të verifikimeve për klientët, faturimet dhe destinacionin e të ardhurave. Dosja e ardhur nga Italia përmban dyshime për pastrim parash dhe aktivitet kriminal. Hetuesit, sipas materialit, po shqyrtojnë transaksione bankare dhe komunikime të zbuluara gjatë procedimeve të tjera.

Nga resorti në Himarë te investimet në Zvërnec

Ndërsa Lopçi zgjeronte aktivitetin e tij, Gaçi përfitonte statusin e investitorit strategjik për një resort luksoz në Himarë. Projekti u përfshi më vonë në dosjen e SPAK-ut për tjetërsimin e pronave. Hetimet goditën ish-kryebashkiakun Jorgo Goro dhe çuan në sekuestrimin e pasurive të lidhura me investimin turistik.

Çështja e resortit vendosi në fokus vendimet bashkiake, dokumentet e pronësisë dhe mënyrën se si u trajtuan interesat e ndërtimit në bregdet. Tashmë, dokumentet e kompanive të lidhura me Lopçin çojnë te një tjetër zonë bregdetare: Akërnia dhe Zvërneci.

Në tetor të vitit 2021, Peninsula Development, e administruar nga Idlir Lopçi dhe e kontrolluar nga Andi Canaj përmes shoqërisë Generate, u bashkua me Smart Construction Invest, të Redi Strugës. Nga bashkimi u krijua South Adriatic Development.

Kompania e re u themelua me kapital të regjistruar prej 400 milionë lekësh, rreth 3,3 milionë euro me kursin e asaj kohe, dhe hyri në tregun e tokave të Akërnisë dhe Zvërnecit.

Marrëveshja me Artur Shehun dhe ndryshimet e kuotave

Më 20 nëntor 2021, South Adriatic Development rezulton në një marrëveshje për blerjen e një prone nga Artur Shehu, me vlerë rreth 2,4 milionë euro. Shehu është përmendur në hetimet e SPAK-ut për trafik narkotikësh dhe pastrim parash, ndërsa transaksionet e pronave të tij në Zvërnec janë bërë objekt i një hetimi tjetër.

Në periudhën kur u krye marrëveshja, Peninsula Development, e administruar nga Lopçi, zotëronte 50 për qind të South Adriatic Development.

Më pas, Peninsula transferoi fillimisht 10 për qind të kapitalit për 5 mijë lekë dhe, më vonë, pjesën tjetër prej 40 për qind për 2 milionë lekë, rreth 16 mijë euro. Pas këtyre veprimeve, kontrolli i South Adriatic Development kaloi tërësisht te kompania e Redi Strugës.

Në prill të vitit 2026, e njëjta shoqëri u përfshi në shitjen e pasurive të paluajtshme në Zvërnec për 70,3 milionë euro te Albania Land Development. Peninsula Development ishte larguar nga ortakëria gati katër vite më parë, por dokumentet e vendosin brenda investimit në fazën e blerjeve fillestare.

Pista e transaksioneve

Në këtë histori, SPAK-u ka hapur hetime për transaksionet e pronave të Artur Shehut, sipas materialit të paraqitur. Toka të blera dhe të transferuara përmes shoqërive tregtare kanë përfunduar në marrëveshje me vlera dhjetëra milionë euro, ndërsa disa prej kompanive kanë ndryshuar ortakë gjatë rrugës.

Administrimi i Peninsula Development nga Idlir Lopçi dhe lidhja e tij shumëvjeçare e biznesit me Artan Gaçin dokumentohen në regjistrat e kompanive. Po ashtu, në dokumente shfaqen xhiroja mbi 1 milion euro e SUPREME, blerja e pronës nga South Adriatic Development dhe transaksioni i mëvonshëm prej 70,3 milionë eurosh.

Dosja italiane e call center-ave e vendos sërish Gaçin përballë SPAK-ut, ndërsa dokumentet e kompanive të lidhura me Lopçin ndërthurin bizneset e hershme, shërbimet telefonike dhe investimet në prona bregdetare. Hetimet mund të sqarojnë më tej marrëdhëniet mes këtyre aktiviteteve dhe lëvizjet e parave nga kompanitë te pronat.