Artan Hoxha: As Smart City i Ramës nuk e kap dot atentatin e Sarandës

Gazetari Artan Hoxha ka ndarë detaje të reja lidhur me atentatin ndaj Thimjo Rubatit në Sarandë, një ngjarje që ka rikthyer vëmendjen te siguria në zonat turistike të vendit.

I ftuar në emisionin “Të Paekspozuarit” në MCN TV, Hoxha theksoi se autorët e sulmit nuk janë identifikuar ende, ndërsa mënyra e largimit të tyre konsiderohet e mirëorganizuar dhe e menduar deri në detaje. Sipas tij, pas kryerjes së atentatit, autorët kanë braktisur mjetin e përdorur pranë bregdetit dhe janë larguar me skaf, duke përfituar nga fluksi i madh i turistëve dhe trafiku i rënduar në rrugët tokësore të Sarandës.

Ai nënvizoi se qyteti bregdetar, i mbushur gjatë sezonit veror, e bën të vështirë arratisjen nëpërmjet rrugëve tradicionale, çka ka detyruar autorët të zgjedhin rrugën detare. Sipas Hoxhës, ky është një atentat me kosto të lartë, që kërkon organizim dhe burime të konsiderueshme financiare.

I plagosuri është transportuar drejt një spitali në Janinë, ku po merr trajtim mjekësor. Ai ka marrë tre plagë nga arma e zjarrit, por fatmirësisht ndodhet jashtë rrezikut për jetën.

Sa i përket motiveve, gazetari përmendi një incident të ndodhur një ditë më parë, ku djali i Rubatit është përfshirë në një konflikt fizik me një efektiv policie në Sarandë. Megjithatë, sipas tij, hetimet nuk e lidhin këtë përplasje me atentatin, duke e orientuar vëmendjen drejt së kaluarës së viktimës.

Hoxha solli në vëmendje se Rubati ka një histori të gjatë problematike me drejtësinë, që daton që nga viti 2002. Në të kaluarën ai është përfshirë në vepra të rënda penale, përfshirë trafik të qenieve njerëzore, abuzime me të mitur, kontrabandë dhe trafik klandestinësh. Gjithashtu, ai ka qenë i arrestuar edhe për rrëmbimin e një vajze 13-vjeçare.

Megjithë këto të dhëna, ende nuk është përcaktuar qartë shkaku i konfliktit që çoi në atentat. Autoritetet po vijojnë hetimet, ndërsa pritet që bashkëpunimi i të plagosurit me policinë të ndihmojë në zbardhjen e plotë të ngjarjes.

Në analizën e tij, Hoxha ngriti shqetësimin për shtimin e ngjarjeve të rënda kriminale në zona si Saranda dhe Memaliaj, duke theksuar se këto zhvillime lidhen shpesh me aktivitetet e trafikut dhe përplasjet mes grupeve kriminale.