Atletico Madrid “torturon” Barcelonën në Copa Del Rey

Atletico Madrid ka hedhur një hap të madh drejt finales së Copa del Rey, pasi mposhti bindshëm Barcelona me rezultatin e thellë 4-0 në ndeshjen e parë gjysmëfinale.

Skuadra e drejtuar nga Diego Simeone e nisi sfidën në mënyrë perfekte, duke kaluar në avantazh që në minutat e para. Një autogol i mbrojtësit Garcia pas vetëm gjashtë minutash lojë i dha epërsinë madrilenëve dhe vendosi ritmin e ndeshjes.

Dominimi i vendasve vijoi gjatë gjithë pjesës së parë. Antoine Griezmann dyfishoi shifrat, ndërsa më pas rrjetën e tundën edhe Lookman dhe Alvarez, duke e çuar rezultatin në 4-0 që para pushimit. Barcelona u shfaq e pafuqishme për të reaguar përballë presionit dhe efikasitetit të kundërshtarit.

Në pjesën e dytë, katalanasit tentuan të riktheheshin në lojë dhe arritën të shënonin me Cubarsin, por goli u anulua për pozicion jashtë loje pas verifikimit. Kjo i la shifrat të pandryshuara dhe i dha Atleticos një fitore të pastër e të rëndësishme.

Me këtë rezultat, madrilenët e shndërrojnë pothuajse në formalitet ndeshjen e kthimit, e cila do të luhet më 3 mars, ndërsa janë shumë pranë sigurimit të një vendi në finalen e kompeticionit.