I dhuron fanellën simbol të dronit të Beogradit: Zoti është shqiptar

Një takim me simbolikë të veçantë është zhvilluar në Romë, ku Ismail Morina, i njohur ndryshe si Ballist Morina, ka vizituar Erjon Vishkullin, të riun shqiptar që po kurohet në një spital italian pas dëmtimit të rëndë në sy gjatë protestës në Tiranë.

Morina, i cili u bë i njohur në mbarë botën pas ngritjes së dronit me flamurin kuqezi dhe simbolet kombëtare mbi stadiumin e Beogradit, gjatë ndeshjes Serbi-Shqipëri më 14 tetor 2014, ka zgjedhur t’i bëjë Vishkullit një dhuratë me domethënie të veçantë.

Gjatë vizitës në spital, ai i ka dhuruar të riut një fanellë me flamurin që valëviti mbi stadiumin e Partizanit të Beogradit, në një nga episodet më të bujshme të historisë së futbollit shqiptar.

Krahas fanellës, Morina i ka lënë edhe një mesazh personal, ku e cilëson Vishkullin si “autokton” dhe përcjell një mesazh patriotik:

“Për autoktonin Erjon Vishkulli. Rroftë shpirti i shqiptarit. Përshëndetje fitores, Zoti është shqiptar”.

Erjon Vishkulli mbeti i plagosur në njërin sy gjatë protestës së zhvilluar në Tiranë tetë ditë më parë. Për shkak të dëmtimit të rëndë, ai u transportua me urgjencë drejt Romës, ku iu nënshtrua një ndërhyrjeje delikate kirurgjikale. Për transferimin e tij u vu në dispozicion një avion charter nga shteti shqiptar.

Pas ndërhyrjes mjekësore, Vishkulli arriti të shpëtojë syrin, ndërsa tashmë ka nisur një tjetër sfidë të vështirë: procesin e gjatë të rikuperimit të shikimit.

Vizita e Ballist Morinës dhe dhurata simbolike vijnë në një moment të rëndësishëm për të riun, i cili vijon trajtimin në Itali.