Kërkojnë pagesën e qirave të prapambetura: Na paguani detyrimet

Banorë nga disa prej fshatrave të zonës naftëmbajtëse kanë protestuar sërish përpara ambienteve të kompanisë “Bankers Petroleum”, duke kërkuar shlyerjen e qirave të prapambetura për tokat që përdoren nga kompania.

Në protestë kanë marrë pjesë banorë të Belinës, Marinëzës, Kallmit, Sheqishtës dhe Zharrëzës. Sipas tyre, pagesat për qiratë e tokave nuk janë kryer që prej muajit mars, duke krijuar një situatë të zgjatur pasigurie për familjet që presin përmbushjen e detyrimeve kontraktuale.

Protesta është shoqëruar me tensione, pasi vetëm disa përfaqësues të banorëve janë lejuar të hyjnë në ambientet e kompanisë për të paraqitur kërkesat e tyre. Pjesa tjetër e protestuesve është ndaluar në hyrje nga forcat e policisë.

Kjo ka shkaktuar debate mes banorëve dhe efektivëve të policisë, ndërsa protestuesit kanë kërkuar që të lejohen të gjithë të hyjnë në ambientet e kompanisë. Situata është tensionuar më tej gjatë përpjekjeve të tyre për të vijuar protestën brenda hapësirave të kompanisë.

Në qendër të kërkesave të banorëve është respektimi i marrëveshjeve të lidhura për përdorimin e tokave dhe pagesa e detyrimeve të mbetura. Ata kundërshtojnë gjithashtu uljen e vlerës së qirasë për tokat e përdorura në aktivitetin e kompanisë.

Banorët shprehen se nuk kërkojnë më shumë sesa zbatimin e kontratave dhe marrjen e pagesave që, sipas tyre, u takojnë prej muajsh. Nëse nuk do të ketë një zgjidhje konkrete dhe shlyerjen e detyrimeve, ata paralajmërojnë se protesta mund të përshkallëzohet në ditët në vijim.