Kreu i Partisë Demokratike ka vendosur ta nisë ditën me një video-live në facebook, ku këtë herë është zhvendosur në njësinë numër 5, te “Ura e Selitës” për të takuar qytetarët e kësaj zone.
“Është një mëngjes plot me lëvizje, por numri i njerëzve në dyqane është shumë i vogël, dhe numri i atyre që po pijnë kafe është më i vogël se herët e tjera”, thotë Basha.
Ai akuzon qeverinë se i ka lënë qytetarët në mëshirë të fatit, duke vendosur të pasurojë vetëm oligarkët, ndaj Shqipëria është futur në këtë krizë ekonomike.
Gjatë videos-live ka qenë edhe një qytetare që e përshëndet Bashën, duke i thënë “Mirëmëngjes”, dhe kreu i PD ia kthen përshëndetjen.
“Hapi i parë do të jetë që lekët e shqiptarëve të shkojnë te shqiptarët. Lekët e koncesioneve do t’i kthejmë në pagesa direkte për konsumatorët, për njerëzit që kanë humbur vendet e punës”, tha ndër të tjera Basha.
