Vuçiç i konsideron shqiptarët terroristë

Ish-kryeministri Sali Berisha u shpreh se shteti shqiptar është shndërruar në një makineri të tmerrshme të vjedhjes së qytetarëve. Nga Dibra, kreu i PD-së teksa iu referua inceneratorëve deklaroi se Rama di çfarë firmos, por ai vjedh.

Sipas tij, Rama firmosi 420 mln euro dhe sot nuk është në punë asnjë incenerator.

Po ashtu, një shqetësim që ngriti Sali Berisha janë edhe tenderat sekret, që sipas tij janë rritur 18 herë. Ish-kryeministri u shpreh se kjo qeveri tenderat sekret po i bën ligj.

“Shteti është shndërruar në një makineri të tmerrshme të vjedhjes së qytetarëve. A mundet që një kryeministër të firmosë 420 mln euro për djegësat dhe mos ketë sot asnjë djegës në punë dhe si përgjigjet: Po, ashtu firmos unë fet e fet. Po ato janë qindra miliarda të këtyre njerëzve. Ti di cfarë firmos, por ti vjedh. Prandaj ikin shqiptarët.

Tenderat sekret janë rritur me 18 herë. Këto bëhen shumë rrallë. Këta e kanë bërë ligj tenderin sekret.

Vjedhin në mënyrë të tmerrshme me pasurinë publike. Merr  1 mln metër katror në portin e Durrësit dhe thotë do ndërtoj Dubain me paratë e drogës. Të njëjtën gjë bën edhe me Butrintin.  Vendi është në rrezik, ne këtë nuk e shpikim”, tha Berisha.

Berisha iu referua edhe marrëdhënieve të Ramës me Presidentin e Serbisë, Aleksandër Vuçiç, për të cilin tha se ai i paraqet shqiptarët si terroristë.

“Vucic na paraqet ne si terrorist. Shqiptarët po terrorizojnë serbet. Serbët po torturohen thotë ai. Ose NATO ti ndalë ose do ti ndalim vet. Unë ju them se nuk ka minoritet më të mbrojtur sesa minoritet serb në Kosovë.

Të gjitha organizmat ndërkombëtare e mbikëqyrin. Unë që po ju flas si kryeministër jam marrë me përkushtimin e tyre me fondet e qeverisë shqiptarë kemi investuar për ta. Kush po e kërcënon minoritetin serb, Vucic dhe urrejtja e tij ndaj shqiptarëve. Vucic është vëllau i Edi Ramës.

Edi Rama u bë avokati i tij në samitin e NATO-s. Jo i tha shteteve të NATOs mos i kërkoni pse nuk po zbaton sanksionet e Rusisë”, u shpreh Berisha.

Berisha thirrje dibranëve për ndalimin e ndërtimit të Skavicës: Mos lejoni përmbytjen e 40 fshatrave!

Berisha në fjalën e tij theksoi se projekti për Skavicën sjell përmbytjen e 6 mijë hektarë tokë buke si dhe shpërnguljen e 40 fshatrave në zonë.

Sipas tij ky projekt nuk do të realizohet pasi askush nuk mund të lejojë zhdukjen e Dibrës, projekt të cilin nuk ia kanë arritur ta bëjnë as pushtuesit më të egër.

“Në vitin 2005 kur sa mora postin e kryeministrit, më vjen një kompani italiane dhe më thotë se ne kemi kontratën e firmosur me Fatos Nanon për të ndërtuar hidrocentralin e Skavicës. I them që kontratën e ke po hidrocentralin nuk do ta ndërtosh.

Më thotë pse, rastisi burrë fisnik, i thashë po të shkosh t’i në atë rreth ti do të bindesh që nuk do ta ndërtosh dot.

U kthye pas një muaji dhe më tha kishe të drejtë nuk përmbytet ajo zonë.

Të gdhihesh sot si Enver Hoxha, dhe të thuash se po përmbyt 40 fshatra. Nuk mund ta bësh atë kurrë. Mirë Enver Hoxha se ishte ai që ishte, po si ka mundësi që ti Edi Rama të ndjekësh pikë projektin e tij për përmbytjen e Dibrës.

Si ka mundësi të firmosësh që të përmbytësh mbi 6 mijë hektarë tokë buke për të shpërngulur 37 apo 40 fshatra. Këtë vit doli lajmi se hidrocentralet private e ndërtuara pas 2007-ës kanë prodhuar më shumë energji se ato publike. Si ka mundësi që sot t’i do të ndërtosh hidrocentrale të tilla me përmbytje?

Shqipëria është vendi më me diell, mund të ndërtojë panele diellore.

Por jo do të përmbysi Dibrën. I bëj thirrje të gjithë dibranëve të ndalojnë Skavicën. Duan të zhdukin Dibrën por nuk do ia dalin dot, nuk ia kanë dalë pushtuesit më të egër se kanë lënë kockat këtu”, tha Berisha.