Beteja për drejtimin e SPAK, Elvin Gokaj prezanton strategjinë e tij

Këshilli i Lartë i Prokurorisë (KLP) po zhvillon sot mbledhjen për zgjedhjen e kreut të ri të Prokurorisë së Posaçme Kundër Korrupsionit dhe Krimit të Organizuar (SPAK). Në garë janë katër kandidatë: Adnan Xholi, Elvin Gokaj, Doloreza Musabelliu dhe Klodian Braho.

Elvin Gokaj është i treti që prezanton platformën e tij dhe thekson se qendron para KLP-së jo për një detyrë, por për të marrë përgjegjësinë e drejtimit të SPAK.

“Platforma ime bazohet në një përvojë profesionale 26-vjeçare në fushën e drejtësisë. Veprimtaria ime do të fokusojë luftën e pandërprerë kundër korrupsionit dhe krimit të organizuar, konsolidimin e institucionit përmes përmirësimit të strukturës dhe shtimit të kapaciteteve njerëzore me ekspertë të fushave të ndryshme, ndërtimin e marrëdhënieve me partnerët ndërkombëtar dhe forcimin e besimit të publikut. Drejtimi i ri i SPAK do të nisë me një analizë të përgjithshme, në mënyrë që ndërhyrjet të jenë sa më efektive,” deklaroi Gokaj.

Profili i Elvin Gokajt

• Studimet e larta i ka përfunduar në Universitetin “Luigj Gurakuqi” në Shkodër (1994–1998).

• Emëruar prokuror më 5 dhjetor 2000.

• Detyrat e tij:

  • 2000–2007: Prokuror në Prokurorinë pranë Gjykatës së Shkallës së Parë Mat

  • 2007–2012: Prokuror në Prokurorinë pranë Gjykatës së Shkallës së Parë Elbasan

  • 2013–2014: Prokuror në Prokurorinë pranë Gjykatës së Shkallës së Parë Durrës

  • 2014–2021: Prokuror dhe drejtues në Prokurorinë pranë Gjykatës së Apelit Shkodër

• Që nga 13 dhjetori 2021 dhe aktualisht, mban detyrën e Prokurorit në SPAK.