Aktualisht, tatimifitimi 5 për qind paguhet për bizneset me xhiro nga 5 milionë deri në 8 milionë lekë në vit. Lera tha se në këtë fashë xhiroje janë 1350 subjekte, ndërsa me xhiro 8 deri në 10 milionë 800 subjekte.
“Besoj se ndryshimi do jetë gati shumë shpejt, për të gjetur atë nivel qarkullimi, i cili harmonizon interesat e biznesit, dëshirën e tyre për të deklaruar qarkullimin real të xhiros. Ne po shohim disa variante. Një variant është me 10 milionë, me 12 milionë, një variant me shifër tjetër. Duke bërë llogaritje,t vetëm me deklaratat që kemi nga bizneset janë disa mijëra në varësi të nivelit të qarkullimit. Me xhiro 0 deri në 5 milionë janë 7500 subjekte. Me qarkullim 5 deri në 8 milionë janë 1350 subjekte. Me qarkullim 8 deri në 10 milionë janë 800 subjekte. Nuk është çështja se sa nga këto subjekte do të përfitojnë. Flasim për 71 mijë subjekte që janë në skemën e biznesit të vogël, pra, që janë me qarkullim mbi 5 milionë lekë dhe iu është ofruar normë tatimfitimi më e ulët, pra, 5 për qind sesa do ta rrisin deklarimin e tyre. Ky numër është për t’u parë në varë- si të deklarimit”, tha Lera. Drejtori i përgjithshëm i Politikave Fiskale sqaroi se rritja e pragut synon të formalizojë transaksionet e biznesit.
“Është bërë një debat shumë i madh për uljen e pragut të TVSH-së nga 5 milionë në 2 milionë. Ne kemi sqaruar se TVSH-ja është tatim që e paguan konsumatori dhe duhet të marrim të gjitha masat e duhura që ky tatim i paguar nga konsumatori të shkojë në buxhetin e shtetit. Ulja e pragut synon që ne të kontrollojmë transaksionet apo zinxhirin e transaksionit. Meqenëse morëm këtë masë, atëherë duhet të parashikojmë edhe masa të tjera që biznesi i vogël të deklarojë në mënyrë të ndershme qarkullimin, pa pasur frikë se do i rritet barra fiskale.
Shqetësimi i biznesit është se nëse ai deklaron xhiron reale, do t’i duhet të tejkalojë xhiron prej 8 milionë lekësh në vit dhe në këtë rast duhet të paguajë tatimfitimin prej 15 për qind. Për të lehtësuar këtë barrë për subjekte me qarkullim të ulët, 8 milionë, 10 milionë, 12 milionë, ne po shohim skenarët e mundshëm në mënyrë që të harmonizojmë qëllimin kryesor që kemi, për të stimuluar këto biznese të deklarojnë xhiron reale pa pasur frikë se do i rritet barra fiskale dhe nga ana tjetër për të mos krijuar risqe në buxhetin e shtetit”, u shpreh Lera
