Shpallen në kërkim pronarët

Një operacion i gjerë kundër aktivitetit të paligjshëm të Call Center-ave është zhvilluar në Tiranë nga SPAK, në bashkëpunim me autoritetet franceze. Aksioni është përqendruar në zonën pranë Sami Frashërit, ku hetuesit kanë ushtruar kontrolle të detajuara në ambiente të dyshuara për përfshirje në skema mashtrimi ndërkombëtar.

Gjatë ndërhyrjes janë sekuestruar një numër i madh pajisjesh elektronike, përfshirë kompjuterë dhe telefona, si dhe dokumente që përmbajnë të dhëna të operatorëve dhe informacione mbi shtetas të huaj të dyshuar si viktima të mashtrimeve. Hetimet kanë çuar gjithashtu në shpalljen në kërkim të pronarëve të Call Center-it të përfshirë në këtë aktivitet.

Në kuadër të operacionit është shoqëruar edhe një punonjës policie, i cili rezulton të jetë pjesë e Komisariatit nr. 1 në Tiranë. Burime bëjnë me dije se atij i është sekuestruar telefoni celular dhe është ushtruar kontroll edhe në banesën e tij, për të verifikuar çdo lidhje të mundshme me aktivitetin kriminal.

Operacioni mbetet në zhvillim, ndërsa nuk përjashtohet që numri i personave të implikuar të rritet me thellimin e hetimeve. Deri më tani nuk ka një reagim zyrtar të detajuar nga autoritetet mbi rezultatet përfundimtare të aksionit.

Ky zhvillim vjen në vijim të një sërë goditjesh të fundit ndaj rrjeteve të mashtrimit përmes Call Center-ave, ku vetëm pak ditë më parë u zbulua një skemë që dyshohet se u ka marrë qytetarëve europianë rreth 50 milionë euro. Në atë operacion u arrestuan disa persona dhe të tjerë u shpallën në kërkim, ndërsa hetimet vijojnë për zbardhjen e plotë të rrjetit.