Cilët janë 3 të përzgjedhurit për kontrollin e sistemit të drejtësisë

Këshilli i Emërimeve në Drejtësi, nga 13 kandidatë që shprehën interesin për të qenë pjesë e ILD-së, ka konfirmuar deri më tani 3, kandidatja Marsida Xhaferrllari do të marrë një përgjigje sot.

Kështu, një nga kandidatët për anëtar i ILD-së është gjyqtari Artur Malaj, gjyqtar i Gjykatës Administrative. Mes disa dyshimeve për pasurinë, Malaj arriti të kalonte kontrollin e trefishtë të KPK-së në gusht të vitit që lamë pas, ndërsa vendimi është ankimuar nga Komisioneri Publik, i cili kërkon shkarkimin e tij.

Kandidati tjetër që aspiron ILD-në është Artur Metani. Në tetor të 2018-ës, Metani u emërua avokat i Përgjithshëm i Shtetit me urdhër të Kryeministrit, ndërsa ka një karrierë të gjatë në administratë. Më herët ka qenë këshilltar ligjor në kabinetin e Presidentit të Republikës, të Presidentit Meidani, Presidentit Moisiu dhe Presidentit Topi.

Ndërsa nga viti 2013, është emëruar drejtor i Njësisë së Legjislacionit, Monitorimit të Programeve dhe Kontrollit të Brendshëm në Kryeministri. Edhe drejtuesja e Inspektoratit të Lartë të Drejtësisë, Marsida Xhaferrllari, ka kandiduar, por situata e saj mbetet e paqartë, për sa kohë KPK doli me një vendim pa vendim për të, pasi kreu një hetim 14-mujor. KED do të shprehet në mbledhjen e sotme nëse konfirmon ose jo kandidaturën e saj.

Kandidate e konfirmuar nga KED për të vazhduar garën për në ILD është edhe avokatja Eris Hysi. Të përjashtuar nga gara gjatë fazës së parë janë Altin Hazizaj, aktivist i shoqërisë civile dhe themelues i CRCA; Elira Kokona, sekretare e Përgjithshme, Ministria e Drejtësisë; Ferdinand Caka, avokat; Genci Gjonçaj, sekretar i Përgjithshëm i Kuvendit të Shqipërisë; Genci Ismaili, avokat; Klodian Rado, ekspert i EURALIUS; Lefteri Lleshi, ish-kryetarja e Komisionit Qendror të Zgjedhjeve; Mimoza Qinami, avokate dhe Suzana Frashëri.