Deja vu/ Sulmi ndaj Trumo, në të njëjtin vend ku u qëllua Ronald Reagan

Sulmi i fundit me armë në Washington Hilton ka rikthyer në vëmendje një nga ngjarjet më tronditëse në historinë moderne të SHBA-së, pikërisht atentatin ndaj Ronald Reagan në vitin 1981.

Më 30 mars të atij viti, Reagan u qëllua nga John Hinckley Jr. teksa po dilte nga hoteli pas një aktiviteti publik. Autori hapi zjarr në momentin kur presidenti po i afrohej limuzinës së tij.

Edhe pse i plagosur rëndë, Reagan arriti të mbijetojë. Një prej plumbave bëri rikoshet nga automjeti presidencial dhe e goditi, duke i shkaktuar thyerje në brinjë dhe dëmtime serioze në mushkëri. Ai u transportua me urgjencë në George Washington University Hospital, ku qëndroi nën kujdes intensiv deri në rikuperimin e tij.

Nga sulmi mbetën të plagosur edhe disa persona të tjerë, përfshirë James Brady, zëdhënësin e Shtëpisë së Bardhë, një agjent të Shërbimit Sekret dhe një oficer të policisë lokale. Brady pësoi dëmtime të rënda në tru, duke mbetur me pasoja të përhershme që e shoqëruan deri në ndarjen nga jeta në vitin 2014.

Autori i sulmit, Hinckley, u shpall më vonë i pafajshëm për shkak të gjendjes mendore dhe u dërgua në një institucion të sigurisë së lartë, St. Elizabeths Hospital, ku qëndroi për dekada deri në lirimin e tij në vitin 2016.

Sot, një pllakë përkujtimore në ambientet e jashtme të hotelit shënon vendin ku ndodhi atentati, duke e kthyer këtë vend në një simbol të historisë së sigurisë presidenciale në SHBA.

Ngjarja e fundit në të njëjtin hotel ka rikthyer kujtesën e këtij episodi dramatik, duke ngritur sërish shqetësime mbi sigurinë, edhe në eventet më të rëndësishme dhe më të mbrojtura në vend.