“E Doctor” përfiton për herë të dytë

Një denoncim i mbërritur në redaksi ngre pikëpyetje mbi mënyrën e përfitimit të fondeve publike nga disa biznese të reja, duke pretenduar se disa prej fituesve kanë qenë të regjistruar vetëm prej pak muajsh në momentin kur kanë përfituar financime.

Sipas denoncimit, një prej rasteve lidhet me biznesin e Arvjen Lushajt, i cili, sipas informacionit të dërguar në redaksi, është hapur në shkurt të vitit 2026. Pavarësisht kohës së shkurtër të aktivitetit, pretendohet se subjekti ka përfituar në fazën e dytë të financimit rreth 38 milionë lekë të vjetra.

Denoncuesi ngre pikëpyetje mbi kriteret e përfitimit, duke pretenduar se për këtë kategori financimi biznesi duhet të ketë të paktën një vit aktivitet.

Një tjetër rast i përmendur në denoncim është ai i Emanuel Shamkut. Sipas informacionit të dërguar, edhe ky biznes është hapur në shkurt të vitit 2026, ndërsa pretendohet se ka përfituar rreth 37 milionë lekë të vjetra në fazën e dytë të financimit.

“Dy muaj biznes dhe përfiton 37 milionë lekë të vjetra, ndërkohë që duhet të ketë të paktën një vit”, thuhet në denoncim.

Por pikëpyetjet nuk ndalen vetëm te bizneset e sapokrijuara.

Në materialin e dërguar në redaksi përmendet edhe subjekti E Doctor, për të cilin denoncuesi pretendon se ka përfituar për herë të dytë nga fondet, ndërsa ngre pretendimin se biznesi nuk është funksional.

Këto pretendime ngrenë pikëpyetje mbi kriteret e përzgjedhjes së përfituesve, verifikimin e aktivitetit të bizneseve dhe mënyrën e shpërndarjes së fondeve publike.

Megjithatë, për të përcaktuar nëse ka pasur shkelje të kritereve, nevojitet verifikimi i dokumentacionit zyrtar të programit, listave të përfituesve dhe kushteve që duhet të plotësonte çdo subjekt për të përfituar financimin.

Redaksia mbetet e hapur për reagimin dhe sqarimet e institucioneve përgjegjëse, si dhe të subjekteve të përmendura në këtë denoncim.