Denoncimi i Ballës: Serbët pse duhet të protestojnë për Zvërnecin?

Deklaratat politike rreth protestave në Zvërnec janë tensionuar më tej, pasi Taulant Balla ka publikuar një foto që, sipas tij, është realizuar gjatë tubimit të sotëm në zonë. Në reagimin e tij, ai hedh dyshime për praninë e shtetasve të huaj në protestë, duke e cilësuar situatën si pjesë të një skenari më të gjerë destabilizues.

Sipas Ballës, në protestë janë identifikuar edhe persona me targa serbe, duke ngritur pikëpyetje mbi arsyen e pranisë së tyre në një tubim që lidhet me një çështje të brendshme. Ai shprehet se një zhvillim i tillë nuk mund të jetë rastësor dhe sugjeron se pas protestës mund të ketë ndikime të jashtme.

“Ja dhe ata që e ‘duan’ më shumë se ne Shqipërinë… Po këto makina me targa serbe dhe serbët pse duhet të jenë në protestë për Zvërnecin?!”, shkruan ai në reagimin e tij publik.

Në vijim, ai u është përgjigjur edhe komentuesve në rrjetet sociale, duke përdorur një gjuhë të ashpër ndaj kritikëve. Ai paralajmëron se, sipas tij, në të ardhmen do të dalin në dritë elementë që lidhen me atë që e quan “luftë hibride” kundër Shqipërisë.

Reagimi i Ballës vjen në një moment kur protestat kundër projektit në Zvërnec janë përshkallëzuar dhe kanë marrë një dimension më të gjerë politik. Ndërkohë, pjesëmarrësit në protestë kanë theksuar se mobilizimi i tyre është i pavarur dhe i motivuar nga shqetësimet për mjedisin dhe interesin publik.

Debati mbetet i hapur, ndërsa deklarata të tilla pritet të shtojnë më tej përplasjet politike dhe ndarjen e opinioneve në publik.