Deputeti i Tom Doshit provokon protestuesit me gjestin e papritur

Situata para godinës së Kuvendit është tensionuar ndjeshëm gjatë protestës që po zhvillohet paralelisht me seancën plenare.

Përplasjet kanë nisur pasi deputeti i Partisë Socialdemokrate (PSD), Besnik Brahimi, është parë duke bërë një gjest provokues ndaj turmës, duke u ngritur dy gishtat lart. Ky veprim ka shkaktuar reagime të menjëhershme, duke përshkallëzuar tensionin në hyrje të Parlamentit.

Besnik Brahimi është pjesë e forcës politike të drejtuar nga Tom Doshi, ndërsa incidenti ka ndezur më tej atmosferën e protestës.

Pas këtij momenti, një grup protestuesish u afruan drejt perimetrit të sigurisë dhe hoqën një pjesë të gardhit metalik të vendosur nga autoritetet për të mbrojtur hyrjen e Kuvendit.

Në vendngjarje ndërhynë menjëherë forcat e Policisë, të cilat u pozicionuan për të ndaluar avancimin e protestuesve dhe për të mbajtur situatën nën kontroll.

Protesta vijon e tensionuar, me përplasje sporadike mes qytetarëve dhe policisë, ndërsa mbetet për t’u parë se si do të zhvillohen ngjarjet në vijim.