Digjen 3 automjete pranë Postës Shqiptare në Tiranë

Tre makina janë përfshirë nga flakët në orët e vona të natës në kryeqytet, pranë godinës së Postës Shqiptare në rrugën “Çamëria”.

Sipas të dhënave paraprake, dyshohet se zjarri mund të jetë shkaktuar në mënyrë të qëllimshme, ndërsa dëmet materiale në automjetet e prekura rezultojnë të konsiderueshme.

Menjëherë pas ngjarjes, shërbimet e policisë kanë nisur veprimet hetimore, duke u fokusuar në analizimin e kamerave të sigurisë në zonë. Qëllimi është identifikimi i çdo personi apo lëvizjeje të dyshimtë që mund të lidhet me incidentin.

Fatmirësisht, nuk raportohet për persona të lënduar. Autoritetet pritet të japin një reagim zyrtar në vijim, ndërsa vijojnë verifikimet për zbardhjen e plotë të rrethanave dhe shkakut të zjarrit.