Dosja “Tahiri”/ Përfundon afati i hetimeve, çfarë pritet të ndodhë

Ditën e hënë, përfundon afati i hetimit të procedimit penal të nisur ndaj ish-ministrit të Brendshëm, Saimir Tahiri, i cili akuzohet për trafik narkotikësh në kuadër të grupit të Habilajve.

Pas dy shtyrjesh, prokuroria pritet të dalë me një vendim nëse do ta dërgojë për gjykim ish-ministrin Tahiri, do të pushojë çështjen, apo do kërkojë sërish shtyrjen e hetimeve me 3 muaj të tjera. Gjasat janë të ndodhë skenari i fundit, duke pasur parasysh precedentin për Jaeld Çelën, ish-Drejtorin e Policisë së Vlorës, i cili është pjesë e së njëjtës dosje. Cilado qoftë kërkesa, fjalën e fundit e thotë gjykata.

Nga hetimet e kryera, ish-ministri Tahiri dyshohet se i ka krijuar lehtësira grupit të Habilajve, për kultivimin dhe më pas trafikimin e kanabisit drejt Italisë. Këto dyshime Prokuroria e Krimeve të Rënda i ka ngritur pasi në më shumë se një rast eksponentë të grupit kriminal kanë përdorur mjete motorike dhe detare në emër të ish-ministrit Tahiri. Për këtë prokuroria ka marrë edhe disa letër-porosi nga Greqia, Mali i zi dhe Italia. Ndërkohë, vetë ish-ministri ka mohuar akuzat.