Dyshimet/ Zbardhen detaje të reja nga vrasja e Edmond Sulës

Zbardhen detaje të reja lidhur me vrasjen e Edmond (Ali) Sulës, ngjarje e ndodhur në Bërxullë të Vorës, ku hetuesit po fokusohen te pista e një atentati të mirëorganizuar.

Sipas burimeve nga grupi hetimor, dyshimet e para janë se ekzekutimi është kryer nga një vrasës me pagesë, bazuar në mënyrën e planifikuar të sulmit dhe faktin që autori ka vepruar i vetëm në momentin e qëllimit.

Nga të dhënat paraprake rezulton se autori e ka pritur 50-vjeçarin deri në momentin kur ai ka zbritur nga automjeti dhe po hynte në banesën e tij në Bërxullë. Në atë çast, ai është qëlluar me një plumb në kokë, duke humbur jetën në vend.

Pamjet e kamerave të sigurisë kanë fiksuar autorin teksa largohet në këmbë nga vendi i ngjarjes. Më pas, dyshohet se ai është ndihmuar nga persona të tjerë, të cilët e kanë marrë me automjet për t’u larguar.

Edmond Sula ishte një person i njohur për Policinë e Shtetit, pasi në të kaluarën ishte proceduar për disa vepra penale, përfshirë rrahje, grabitje dhe konflikte të ndryshme.

Aktualisht, pista kryesore e hetimit lidhet me çështje pronësie. Sula merrej me shitblerjen e pronave dhe hetuesit po verifikojnë konfliktet e mundshme që mund të kenë lindur nga kjo veprimtari.