Ekzekutohet Saif al-Islam, djali i ish-liderit libian Muamar Gaddafi

Saif al-Islam Gaddafi, djali më i njohur i ish-liderit libian Muamar Gaddafi, raportohet se është vrarë në Libi, sipas zyrtarëve dhe mediave lokale.

Lajmi u bë publik të martën nga avokati i tij, Khaled al-Zaidi, dhe këshilltari politik Abdulla Othman, të cilët njoftuan vdekjen e 53-vjeçarit përmes postimeve të ndara në Facebook, pa dhënë detaje zyrtare mbi rrethanat.

Sipas agjencisë libiane të lajmeve Fawasel Media, Othman deklaroi se Saif al-Islam Gaddafi u vra nga persona të armatosur në banesën e tij në qytetin Zintan, rreth 136 kilometra në jugperëndim të Tripolit. Ekipi politik i Gaddafit konfirmoi më vonë se katër persona të maskuar sulmuan shtëpinë e tij dhe e ekzekutuan në atë që e cilësoi si një “vrasje frikacake dhe të pabesë”.

Në deklaratë thuhet se Gaddafi u përlesh me sulmuesit, të cilët ndërprenë funksionimin e kamerave të sigurisë, në një përpjekje për të fshehur gjurmët e krimit. Ndërkohë, Khaled al-Mishri, ish-kreu i Këshillit të Lartë Shtetëror me seli në Tripoli, bëri thirrje për një hetim urgjent dhe transparent.

Edhe pse nuk mbajti kurrë një post zyrtar shtetëror, Saif al-Islam Gaddafi konsiderohej figura e dytë më e fuqishme e regjimit të babait të tij nga fillimi i viteve 2000 deri në vitin 2011, kur Muamar Gaddafi u vra dhe regjimi i tij shumëvjeçar u rrëzua.

I arsimuar në Perëndim dhe i njohur për profilin e tij publik si reformator, Saif al-Islam luajti një rol kyç në përmirësimin e marrëdhënieve të Libisë me vendet perëndimore, duke udhëhequr negociatat për braktisjen e armëve të shkatërrimit në masë dhe kompensimin për viktimat e sulmit të Lockerbie-t.

Megjithatë, gjatë kryengritjes së vitit 2011, ai u rreshtua hapur në krah të familjes, duke u shndërruar në një nga figurat kryesore të shtypjes së dhunshme të protestave. Ai u kap në vitin 2011 në Zintan, u mbajt në burg për disa vite dhe u lirua në vitin 2017 pas një faljeje të përgjithshme.

Saif al-Islam Gaddafi ishte i kërkuar nga Gjykata Ndërkombëtare Penale për krime të dyshuara kundër njerëzimit dhe ishte dënuar me vdekje në mungesë nga një gjykatë në Tripoli në vitin 2015. Pas lirimit, ai jetonte i izoluar në Zintan për arsye sigurie.

Në vitin 2021, ai shpalli kandidaturën për president të Libisë, duke shkaktuar reagime të forta dhe protesta, ndërsa procesi zgjedhor përfundoi në një tjetër bllokim politik për vendin.

Rrethanat e vrasjes së tij mbeten ende të paqarta, ndërsa autoritetet nuk kanë dhënë një reagim zyrtar deri më tani. Nëse konfirmohet, ngjarja pritet të ketë ndikim të fortë në skenën e brishtë politike të Libisë.