Erdogan shpërthen ndaj kancelarit Merz: A nuk i shihni masakrat në Gaza?

Presidenti turk, Recep Tayyip Erdogan, ka akuzuar ashpër Gjermaninë për “mosreagimin ndaj gjenocidit që Izraeli po kryen ndaj popullit të Gazës”.

Deklarata e tij erdhi gjatë një konference të përbashkët për shtyp me kancelarin gjerman Friedrich Merz, zhvilluar në Ankara, ku tensionet mes dy liderëve u bënë të dukshme.

Erdogan tha se Izraeli “ka qasje në armë bërthamore dhe armë të ndaluara ndërkombëtarisht”, të cilat po i përdor për të kërcënuar dhe shkatërruar Gazën, ndërsa theksoi se Hamasi nuk zotëron armë të tilla.

“Duhet t’i japim fund gjenocidit dhe urisë së qëllimshme, duke përfshirë Kryqin e Kuq gjerman dhe Gjysmëhënën e Kuqe turke. A nuk i sheh këto Gjermania? Është detyrë humanitare e jona, e Gjermanisë dhe e vendeve të tjera që t’i japim fund urisë dhe masakrave në Gaza”, deklaroi Erdogan.

Sipas tij, Izraeli po përdor urinë dhe dhunën si armë për të nënshtruar Gazën, ndërsa kërkoi ndërhyrje ndërkombëtare për t’i dhënë fund sulmeve.

Në përgjigje, kancelari gjerman Merz tha se “Izraeli është bërë një strehë për miliona hebrenj, përfshirë të mbijetuarit e Holokaustit”, duke theksuar se Gjermania do të qëndrojë gjithmonë në krah të Izraelit.

“Izraeli po ushtron të drejtën e tij për vetëmbrojtje pas sulmit të Hamasit më 7 tetor 2023. Kjo luftë do të kishte marrë fund nëse Hamasi do të kishte liruar pengjet dhe dorëzuar armët”, deklaroi Merz.

Erdogan kundërshtoi prerazi duke thënë se Hamasi nuk ka kapacitet bërthamor dhe se Izraeli po shkel armëpushimin e ndërmjetësuar nga SHBA, i arritur më 10 tetor. Ai shtoi se Turqia dhe Gjermania mund të bashkëpunojnë për paqe, ashtu siç po përpiqen në konfliktin Rusi–Ukrainë.

Pavarësisht armëpushimit, Izraeli kreu bombardime të reja në Gazë, pas vrasjes së një ushtari izraelit në Rafah.
Sipas Ministrisë së Shëndetësisë në Gaza, 104 persona humbën jetën, shumica gra dhe fëmijë.

Gazetari i Al Jazeera-s, Hani Mahmoud, raportoi se sulmet e fundit “ishin po aq intensive sa javët e para të konfliktit”.
Ndërkohë, Katari, që ndërmjetëson marrëveshjen e paqes, i ka quajtur shkeljet izraelite “zhgënjyese dhe irrituese”, ndërsa Izraeli refuzon përfshirjen e trupave turke në forcën ndërkombëtare të propozuar nga SHBA për monitorimin e armëpushimit.

Sipas autoriteteve palestineze, lufta në Gaza që prej tetorit 2023 ka shkaktuar mbi 68 mijë të vrarë dhe rreth 170 mijë të plagosur, ndërsa në sulmet fillestare të Hamasit humbën jetën 1.139 izraelitë dhe rreth 200 persona mbeten peng.