Fundi i një epoke në “Fiks Fare”: Largohet Filip Çakuli

Pas më shumë se dy dekadash në krye të emisionit investigativ “Fiks Fare”, gazetari dhe drejtuesi Filip Çakuli pritet të largohet nga programi, duke shënuar fundin e një prej periudhave më të gjata të drejtimit të një formati televiziv në Shqipëri.

Sipas burimeve pranë Top Channel, Çakuli dhe zëvendësuesja e tij, Denisa Haxhiaj, janë njoftuar për largimin nga emisioni.

“Fiks Fare”, një nga formatet e para dhe më jetëgjata të gazetarisë investigative në televizionet shqiptare, numëron rreth 25 vite histori. Përgjatë kësaj periudhe, emisioni është identifikuar me denoncimet, kamerat e fshehta dhe investigimet mbi problematika të administratës publike, korrupsionit, abuzimeve dhe çështjeve që prekin drejtpërdrejt qytetarët.

Antela Lika merr drejtimin

Drejtimin e skuadrës së “Fiks Fare” mësohet se e ka marrë tashmë gazetarja Antela Lika, prej vitesh pjesë e ekipit investigativ të emisionit.

Lika është autore e një sërë investigimesh dhe denoncimesh të transmetuara ndër vite në ekranin e “Fiks Fare”, disa prej të cilave kanë marrë vëmendje të gjerë publike.

Ndryshimi në drejtim konsiderohet një kthesë e rëndësishme për formatin, i cili pritet të vijojë me një strukturë të re drejtuese, duke ruajtur profilin investigativ dhe fokusin te denoncimi i problematikave me interes publik.

Largimi i Filip Çakulit pas më shumë se 20 vitesh në krye të “Fiks Fare” mbyll një kapitull të rëndësishëm në historinë e emisionit, ndërsa marrja e drejtimit nga Antela Lika hap një fazë të re për një prej formateve më të njohura investigative të televizionit shqiptar.