“Furtunë” procedimesh në burgun e Fierit, gjendet alkool e drogë

Një aksion i koordinuar mes strukturave përgjegjëse për mbikëqyrjen e sistemit penitenciar ka nxjerrë në pah shkelje serioze brenda Institucionit të Ekzekutimit të Vendimeve Penale në Fier. Kontrollet e zhvilluara gjatë ditës së sotme kanë zbuluar një sasi të konsiderueshme pijesh alkoolike të futura në mënyrë të paligjshme në ambientet e një dhome, si edhe telefona celularë të fshehur në hapësira të përbashkëta të institucionit.

Gjatë operacionit është ushtruar edhe kontroll personal ndaj një të paraburgosuri, tek i cili janë gjetur lëndë të dyshuara narkotike të fshehura në veshje, duke ngritur dyshime për aktivitet të paligjshëm brenda ambienteve të burgut.

Në vijim të veprimeve procedurale, të kryera nën drejtimin e Prokurorisë së Fierit, janë marrë masa të menjëhershme ligjore ndaj personave të përfshirë.

Në pranga ka përfunduar shtetasi me iniciale I.B., i dyshuar për futjen dhe mbajtjen e sendeve të ndaluara brenda institucionit penitenciar. Ky person ndodhej tashmë në paraburgim për vepra penale që lidhen me armëmbajtjen pa leje.

Po ashtu, është arrestuar edhe shtetasi A.M., ndaj të cilit rëndojnë dyshime për përfshirje në veprimtari narkotike dhe për futje të sendeve të ndaluara në ambientet e burgut. Ai po vuan një dënim prej 12 vitesh burg për një vepër të rëndë penale kundër jetës.

Ndërkohë, hetimet kanë shtrirë fokusin edhe tek stafi i institucionit. Disa punonjës të Burgut të Fierit po procedohen penalisht në gjendje të lirë për shpërdorim detyre, pasi dyshohet se kanë lejuar ose nuk kanë parandaluar futjen e sendeve të ndaluara në ambientet e sigurisë së lartë.

Autoritetet kanë bërë të ditur se kontrollet do të vijojnë në të gjitha institucionet penitenciare, me synim goditjen e çdo forme paligjshmërie dhe rritjen e standardeve të sigurisë.

1- A. H Shefi i policisë në IEVP Fier,
2- N.H Shefi i regjimit te brendshëm ,
3-A M specialist policie,
4-A.M kontrollor
5-O.K kontrollor
6-R.S. kontrollor.