Sekretari i Përgjithshëm i PD Gazment Bardhi reagon për deklaratat mes Bashës dhe ministres Manastirliu, për zjarrin që sipas kreut të PD ka rënë në godinën e Ministrisë.
Bardhi thotë se nesër PD do të publikojë provat që faktojnë zjarrin në Ministrinë e Shëndetësisë, ndërsa thekson se ky skandal e çon në burg ministren.
“Fronti i vjedhjes me tendera sekret vazhdon avazin e gënjeshtrës! Asgjë e re nga bashkëpunëtorja e Edi Ramës në vjedhje dhe në fshehjen e vjedhjes së parave të shqiptarëve me tendera sekret në kohë pandemie.
Ogerta Manastirliu gënjen paturpësisht për zjarrin e rënë në Ministrinë e Shëndetësisë. Ne kemi prova për këtë skandal dhe do t’i bëjmë publike nesër.
Fakti që Ministrja gënjen për zjarrin duhet të bëhet pjesë e hetimit jo vetëm për vjedhjen, por edhe manipulimin e dokumentave përmes djegies. Ajo gabon rëndë që mendon se duke i zhdukur provat do të shpëtojë nga burgu.
Ogerta Manastirliu boll nxorre tym nga koka dhe gënjeshtra nga goja. E kuptojmë që ky skandal të djeg shumë. Ky është zjarr që të çon në burg dhe nuk e shuan dot me ujë”, shkruan Bardhi.
Ndërkohë, vetë ministrja Manastirliu është shprehur pas akuzave të PD se në Ministri s’ka rënë asnjë zjarr.
