Gjendet i vdekur në rrugë 28-vjeçari shqiptar në Angli

Policia britanike ka bërë publik identitetin e personit që u gjet i pajetë në Compton Road, në Leicester. Viktima është 28-vjeçari shqiptar Ervin Lita, i njohur edhe me emrin Ervin Axhami.

Ngjarja e rëndë u regjistrua në orët e para të mëngjesit të së dielës, më 12 korrik, kur shërbimet e emergjencës u njoftuan nga ambulanca rreth orës 06:58. Pavarësisht ndërhyrjes së menjëhershme, i riu u shpall i vdekur në vendngjarje.

Menjëherë pas konstatimit të vdekjes, autoritetet nisën hetimet për vrasje. Në kuadër të tyre, dy persona, përkatësisht një 36-vjeçar dhe një 27-vjeçar, të dy banues në Leicester, u arrestuan si të dyshuar për përfshirje në krim. Më pas, ata janë liruar me garanci policore, ndërsa hetimet vijojnë për zbardhjen e plotë të ngjarjes.

Policia po punon intensivisht për të sqaruar rrethanat se si 28-vjeçari përfundoi i pajetë në rrugë. Hetuesit kanë nisur analizimin e pamjeve të kamerave të sigurisë, po kryejnë ekspertiza forenzike dhe po mbledhin dëshmi nga persona që mund të kenë informacion mbi ngjarjen.

Ndërkohë, familjarët e viktimës po marrin mbështetje nga oficerë të specializuar, teksa autoritetet britanike vijojnë punën për të hedhur dritë mbi këtë rast të rëndë kriminal.