Gjermania ‘dhëmbë për dhëmbë’ me Rusinë, zbulohet lëvizja urgjente e NATO-s

Forcat Ajrore Gjermane u detyruan të ngrihen në ajër me dy avionë luftarakë Eurofighter pasi një aeroplan ushtarak rus u shfaq pa paralajmërim mbi hapësirën ajrore neutrale në Detin Baltik.

Sipas një deklarate zyrtare, NATO urdhëroi reagimin e menjëhershëm pasi avioni i paidentifikuar lëvizte pa plan fluturimi dhe pa komunikim radio. Pas ngjitjes në ajër, pilotët gjermanë konfirmuan se bëhej fjalë për një IL-20M rus të tipit zbulues.

“Dy Eurofighter-ët tanë kryen identifikimin vizual dhe më pas detyra e shoqërimit iu dorëzua partnerëve suedezë të NATO-s”, bënë të ditur autoritetet gjermane, duke shtuar se avionët më pas u kthyen në bazën ajrore Rostock-Laage.

Ngjarja vjen vetëm pak ditë përpara se Këshilli i Atlantikut të Veriut të mblidhet të martën për të diskutuar incidentin e fundit, ku Rusia akuzohet për shkeljen e hapësirës ajrore të Estonisë, një tjetër sinjal i tensioneve në rritje mes Aleancës dhe Moskës.