Gjykata dënon me 17 vite burg Erjon Llapushin, vrasësin e kamarierit në Elbasan

Gjykata e Elbasanit dënoi sot me 17 vite burg Erjon Llapushin në mungesë, për vrasje me dashje të kamarierit Gazment Kurmaku në ngjarjen e rëndë të 2 tetorit 2021, në një lokal në Labinot-Fushë të Elbasanit.

Hetimet zbuluan asokohe se konflikti mes Llapushit dhe viktimës nisi për shkak të një tavoline të rezervuar, që tragjikisht degradoi në sulmin fatal ndaj Kurmakut.

Kryekamarieri 57-vjeçar ndërroi jetë në spital 5 ditë pasi u godit me sende të forta nga Erjon Llapushi, i cili vijon të jetë në arrati dhe në kërkim autoritetet.

Një javë më parë forcat RENEA dhe FNSH zhvilluan një operacion në Pogradec, ku rrethuan banesën e të kërkuarit dhe kryen kontrolle të imtësishme, por nuk arritën ta arrestonin të kërkuarin, sipas autoriteteve.