Ish-luftëtari i Ushtrisë Çlirimtare të Kosovës, Haxhi Shala, është liruar nga Dhomat e Specializuara të Kosovës në Hagë, pas dënimit për vepra që lidhen me pengimin e administrimit të drejtësisë.
Lajmi për lirimin e tij u bë publik fillimisht nga djali i tij, Flakron Shala, përmes një postimi në rrjetet sociale. Në një mesazh të shkurtër dhe emocional, ai shkroi: “Mirë se erdhe në atdhe, babë”, duke konfirmuar rikthimin e Shalës në Kosovë.
Pas lirimit, reagoi edhe Organizata e Veteranëve të Luftës së Ushtrisë Çlirimtare të Kosovës (OVL-UÇK), e cila e mirëpriti ish-luftëtarin me një mesazh publik.
“Mirë se vjen, bashkëluftëtar! Të urojmë shëndet dhe gjitha të mirat në jetë pranë familjes dhe njerëzve të tu”, thuhet në reagimin e organizatës.
Haxhi Shala ishte dënuar nga Dhomat e Specializuara për çështje që lidhen me pengimin e drejtësisë, ndërsa lirimi i tij shënon përfundimin e vuajtjes së dënimit dhe rikthimin pranë familjes.
