Gjyqtarët e KPA-së, i ankohen SHBA-së: Kallëzimet dhe procedimet penale ndaj nesh nga subjektet e gjykuara na kanë vendosur nën një presion

Gjyqtarët e Kolegjit të Posaçëm të Apelimit i ankohen OPDAT-it dhe ambasadës amerikane në Tiranë se janë vendosur nën trysni për shkak të proceseve penale të ngritur ndaj tyre nga subjektet që janë dënuar më parë nga vendimet e këtij kolegji.

Organet e reja të drejtësisë, padisin njëra-tjetrën, duke e parë veten nën presion ndaj një vendimi të pritshëm. Kryetarja e Kolegjit të Posaçëm të Apelimit, Albana Shtylla, përmes një letre i është drejtuar këshilltares së Përhershme Ligjore e Zyrës së OPDAT në ambasadën e Shteteve të Bashkuara Amerikane, Michelle Lakomy, dhe ambasadës amerikane në Tiranë, ku përmend situatën e krijuar pas kallëzimeve të subjekteve, si Luan Daci i dënuar nga ky Kolegj, por dhe një proces i ngritur ndaj gjyqtarit Ardian Hajdari.

“Gjyqtarët e Kolegjit shprehin shqetësimin se kallëzimet dhe procedimet lidhur me to, si edhe mosshqyrtimi apo gjykimi, brenda afateve procedurale, veçanërisht i çështjeve të sipërpërmendura, por jo vetëm, kanë vështirësuar ushtrimin e veprimtarisë gjyqësore të Kolegjit, për më tepër, i ka vendosur ata nën një presion të vazhdueshëm për kryerjen e funksioneve të tyre kushtetuese, duke rrezikuar në këtë mënyrë seriozisht funksionalitetin e Kolegjit, për rrjedhojë dhe të vetë procesit të rivlerësimit”, thuhet në letrën e zonjës Shtylla. Të gjendur nën një trysni deri në përfundimin e këtyre kallëzimeve dhe procedimeve penale ndaj tyre, gjyqtarët e Kolegjit të posaçëm të Apelimit “që gjatë procedurave për trajtimin e këtyre kallëzimeve dhe procedimeve penale nga Prokuroria e Posaçme kundër Korrupsionit dhe Krimit të Organizuar, apo gjatë gjykimit të tyre në të gjitha shkallët e gjyqësorit, përfshirë edhe Gjykatën e Lartë, të garantohen të drejtat procedurale, zbatimi i afateve procedurale, transparenca në përputhje me parashikimit ligjore, si dhe efikasiteti për kryerjen e një procesi të drejtë dhe të shpejtë, me qëllim që të mos pengohet veprimtaria dhe mos cenohet funksionaliteti i Kolegjit të Posaçëm të Apelimit dhe i procesit të rivlerësimit”

LETRA E PLOTE

Znj. Michelle Lakomy

Zyra e OPDAT

Ambasada e SHBA, Tiranë

Gjyqtarët e Kolegjit të Posaçëm të Apelimit, prej fillimit të vitit 2020 janë përballur me kallëzime penale të bëra nga ishsubjektet e rivlerësimit, ndaj të cilëve është marrë masa disiplinore e shkarkimit nga detyra.

Për gjyqtar Luan Dacin tashmë ka një vendim të Gjykatës së Posaçme të Apelit kundër Korrupsionit dhe Krimit të Organizuar. Gjyqtarët e Kolegjit nëpërmjet kësaj shkrese shprehin shqetësimin për një gjykim të rekursit të paraqitur prej gjyqtar Dacit, brenda afateve të parashikuara në Kodin e Procedurës Penale, si dhe në përputhje me këto dispozita ligjore procedurale dhe parimet e procesit të rregullt ligjor.

Gjyqtar Ardian Hajdari, në muajin korrik të këtij viti, është njoftuar nga Prokuroria e Posaçme kundër Korrupsionit dhe Krimit të Organizuar (SPAK) që ndaj tij ka pasur një kallëzim penal, për të cilin kjo prokurori ka regjistruar procedim penal, por pa i atribuuar ende këtij regjistrimi një emër konkret.

Gjyqtarët e Kolegjit shprehin shqetësimin se kallëzimet dhe procedimet lidhur me to, si edhe mosshqyrtimi apo gjykimi, brenda afateve procedurale, veçanërisht i çështjeve të sipërpërmendura, por jo vetëm, kanë vështirësuar ushtrimin e veprimtarisë gjyqësore të Kolegjit për më tepër, i ka vendosur ata nën një presion të vazhdueshëm për kryerjen e funksioneve të tyre kushtetuese, duke rrezikuar në këtë mënyrë seriozisht funksionalitetin e Kolegjit, për rrjedhojë dhe të vetë procesit të rivlerësimit.

Nëpërmjet shprehjes së këtij shqetësimi, kërkojmë të sjellim në vëmendjen tuaj, duke respektuar plotësisht pavarësinë dhe paanësinë në ushtrimin e detyrave dhe vendimmarrjet tuaja, që gjatë procedurave për trajtimin e këtyre kallëzimeve dhe procedimeve penale nga Prokuroria e Posaçme kundër Korrupsionit dhe Krimit të Organizuar, apo gjatë gjykimit të tyre në të gjitha shkallët e gjyqësorit, përfshirë edhe Gjykatën e Lartë, të garantohen të drejtat procedurale, zbatimi i afateve procedurale, transparenca në përputhje me parashikimit ligjore, si dhe efikasiteti për kryerjen e një procesi të drejtë dhe të shpejtë, me qëllim që të mos pengohet veprimtaria dhe mos cenohet funksionaliteti i Kolegjit të Posaçëm të Apelimit dhe i procesit të rivlerësimit.

Gjyqtarët e Kolegjit të Posaçëm të Apelimit, të ndërgjegjshëm dhe të përgjegjshëm për respektimin e të gjitha parashikimeve kushtetuese dhe ligjore që lidhen me të drejtat dhe detyrat e tyre, kërkojnë nëpërmjet kësaj shkrese mbajtjen në konsideratë të shqetësimeve të sipërpërmendura, për t’iu përgjigjur së bashku sfidave të zbatimit të Reformës në Drejtësi.

Kryetare
Albana Shtylla